RRR Oscar Veduka: రోజా, ఆలీ ఎందుకు రాలేదు.. చిన్నచూపు చూశారా.. ఆస్కార్ వేడుకపై నట్టికుమార్ విమర్శలు

ఆస్కార్ అవార్డు మన తెలుగు వారికి దక్కడం మనమంతా గర్వించదగ్గ విషయమని.. అయితే, అంత గొప్ప ఆస్కార్ అవార్డు సాధించిన వాళ్లకి సరైన గౌరవం దక్కలేదని నిర్మాత నట్టికుమార్ అన్నారు. RRR సినిమాలో నాటు నాటు పాటకు గాను సంగీత దర్శకుడు ఎం.ఎం.కీరవాణి, పాటల రచయిత చంద్రబోస్ ఆస్కార్ అవార్డు అందుకున్న విషయం తెలిసిందే. వీరిద్దరూ ఆస్కార్ అవార్డును అందుకున్న నెల రోజుల తరవాత తెలుగు సినిమా నిర్మాతల మండలి (టీఎఫ్‌పీసీ) ఆధ్వర్యంలో టాలీవుడ్‌లోని 24 క్రాఫ్ట్‌ల వారంతా కలిసి కీరవాణి, చంద్రబోస్‌ను ఆదివారం సన్మానించారు. ఈ మేరకు హైదరాబాద్‌లోని శిల్పకళావేదికలో ‘ఆసార్ వేడుక’ను ఘనంగా నిర్వహించారు. ఈ వేడుకకు తెలంగాణ ప్రభుత్వం తరఫున సినిమాటోగ్రఫీ శాఖ మంత్రి తలసాని శ్రీనివాస్ యాదవ్, ఎక్సైజ్ మినిస్టర్ వి. శ్రీనివాస్ గౌడ్ పాల్గొన్నారు. అలాగే, ఆంధ్రప్రదేశ్ ప్రభుత్వం నుంచి సినిమాటోగ్రఫీ మంత్రి చెల్లుబోయిన శ్రీనివాస వేణుగోపాల కృష్ణ విచ్చేశారు. ఇక తెలుగు సినీ పరిశ్రమ నుంచి నిర్మాతలు, దర్శకులు, నటీనటులు.. ఇలా అతిరథమహారథులంతా హాజరయ్యారు. అయినప్పటికీ ఈ వేడుక జరగాల్సిన రీతిలో జరగలేదని నిర్మాత నట్టికుమార్ విమర్శించారు.