Etthara Jenda: ఎగ్జయిట్‌మెంట్ ఆపుకోలేకపోతున్నాం.. స‌ర్‌ప్రైజ్‌ను బ‌య‌ట పెట్టేస్తున్న రాజ‌మౌళి
బాహుబలితో తెలుగు సినిమా బాక్సాఫీస్ రేంజ్ పెంచిన ద‌ర్శ‌కుడు రాజ‌మౌళి. ఇప్పుడు ఆయ‌న డైరెక్ట్ చేసిన మూవీ కోసం యావ‌త సినీ ప్ర‌పంచం ఎంతో ఆస‌క్తిగా ఎదురు చూస్తోంది. తన సినిమా వ‌స్తుందంటే సినిమాపై ఎలాంటి భారీ అంచ‌నాలుంటాయో దర్శక ధీరుడికి తెలిసింత‌గా ఎవ‌రికీ తెలియ‌ద‌న‌డంలో సందేహం లేదు. అందుక‌నే డిఫ‌రెంట్‌గా ప్ర‌మోష‌న‌ల్ యాక్టివిటీస్‌ను ప్లాన్ చేసుకుని ముందు కెళ్తున్నారు రాజ‌మౌళి. సినిమా థియేటర్‌లో ఆడియెన్స్‌కి ఓ సర్ప్రైజ్ ఇవ్వాలనుకున్నారట. కానీ ఇప్పుడు ఎగ్జయిట్‌మెంట్ ఆపుకోలేక సీక్రెట్ రిలీజ్ చేసేస్తున్నార‌ట. ఇంత‌కీ ఆర్ఆర్ఆర్ టీమ్ ఇవ్వ‌బోతున్న సర్ప్రైజ్ ఏంట‌నే వివ‌రాల్లోకి వెళితే.. తెలుగు, హిందీ, కన్నడ, మ‌ల‌యాళ, త‌మిళ భాష‌ల్లో RRR మూవీ భారీ ఎత్తున మార్చి 25న రిలీజ్ అవుతున్న సంగ‌తి తెలిసిందే. సినిమా ప్ర‌మోష‌న‌ల్ యాక్టివిటీలో భాగంగా చిత్ర యూనిట్ శుక్ర‌వారం (మార్చి 10) రోజున ట్రిపుల్ ఆర్ సెల‌బ్రేష్ యాంథమ్ గురించిన ఆస‌క్తిక‌ర‌మైన విష‌యాన్ని తెలియ‌జేసింది. ఈ విష‌యం గురించి దర్శక ధీరుడు రాజ‌మౌళి స్వ‌యంగా ట్వీట్ చేశారు. ‘‘ట్రిపుల్ ఆర్ సర్‌ప్రైజింగ్ యాంథ‌మ్‌ను మార్చి 14న విడుద‌ల చేయ‌బోతున్నాం. నిజానికి ఈ సెలబ్రేషన్ యాంథ‌మ్‌తో ట్రిపుర్ సినిమా చివ‌ర‌లో ఉంచి.. ప్రేక్ష‌కుల‌ను సర్ప్రైజ్ చేయాల‌ని భావించాం. కానీ ఎగ్జ‌యిట్‌మెంట్‌ను ఆపుకోలేకపోతున్నాం’’ అని తెలిపారు జ‌క్క‌న్న. ‘ఎత్తర జెండా..’ అంటూ సాగే ఈ ట్రిపుల్ఆర్ సెలబ్రేషన్ యాంథమ్ ప్రేక్షకుల ముందుకు మార్చి 14న రిలీజ్ కానుంది. మ‌రి ఈ పాట‌లో విశేషాలేంటో తెలుసుకోవాలంటే మార్చి 14 వ‌ర‌కు ఆగాల్సిందే మ‌రి. RRRలో గోండు వీరుడు కొమురం భీమ్‌గా ఎన్టీఆర్‌.. మ‌న్యం వీరుడు అల్లూరి సీతా రామ‌రాజు పాత్ర‌లో రామ్ చ‌ర‌ణ్ న‌టించారు. చ‌రిత్ర‌లో క‌లుసుకోని ఇద్ద‌రు యోధులు క‌లుసుకుని బ్రిటీష్ వారిని ఎదిరిస్తే ఎలా ఉంటుంద‌నే ఫిక్ష‌న‌ల్ పాయింట్‌తో క‌థ‌ను సిద్ధం చేయించి RRR సినిమాను తెర‌కెక్కించారు. నాలుగు వంద‌ల కోట్ల బారీ బ‌డ్జెట్‌తో, హై టెక్నిక‌ల్ వేల్యూస్‌తో ఈ సినిమా రూపొందింది. టాలీవుడ్ అగ్ర హీరోలు న‌టించిన చిత్ర‌మిది. 1920 బ్యాక్ డ్రాప్‌లో సాగే ఫిక్ష‌న‌ల్ పీరియాడిక్ అయిన RRRలో బాలీవుడ్ స్టార్స్ అజ‌య్ దేవ‌గ‌ణ్, ఆలియా భ‌ట్ ల‌తో పాటు హాలీవుడ్ స్టార్స్ ఒలివియా మోరిస్‌, రేస్టీవెన్ స‌న్‌, అలిస‌న్ డూడి త‌దిత‌రులు న‌టించారు.
Comments
Post a Comment