హీరోగా ఎంట్రీ ఇస్తోన్న స్టార్ డైరెక్టర్ శంకర్ తనయుడు

జెంటిల్ మేన్‌, అప‌రిచితుడు, ఒకే ఒక్కడు, రోబో, 2.0 .. వంటి ప‌లు చిత్రాల‌తో ద‌క్షిణాది సినిమాకు గొప్పదనాన్ని తీసుకొచ్చిన స్టార్ డైరెక్ట‌ర్ శంక‌ర్ గురించి ప్ర‌త్యేక‌మైన ప‌రిచ‌యం అక్క‌ర్లేదు. భారీ చిత్రాల‌కు, మేకింగ్‌కి ఆయ‌న కేరాఫ్ అడ్ర‌స్‌గా నిలిచారు. ఇప్పుడు ఆయ‌న ఫ్యామిలీ నుంచి మ‌రో వ్య‌క్తి సినీ రంగంలోకి అడుగు పెడుతున్నారు. ఆ వ్య‌క్తి ఎవ‌రో కాదు.. శంక‌ర్ త‌న‌యుడు అర్జిత్‌. శంక‌ర్ త‌న కొడుకుని హీరోగా ప‌రిచ‌యం చేయ‌డానికి రంగం సిద్ధం చేశార‌ట‌. అర్జిత్‌కు ఇప్ప‌టికే న‌ట‌న‌, యాక్ష‌న్‌, డాన్సులు వంట వాటిలో ప్ర‌త్యేక‌మైన శిక్ష‌ణ ఇప్పించార‌ట శంక‌ర్‌. అన్నీ పూర్తి కావ‌డంతో ఇప్పుడు త‌న‌యుడిని హీరోగా ఇంట్ర‌డ్యూస్ చేయ‌డానికి ఆయ‌నే నిర్మాత‌గా మారారు. స్టార్ డైరెక్ట‌ర్ అయిన శంక‌ర్ రొటీన్‌కు భిన్న‌మైన సినిమాల‌ను నిర్మాత‌గా చేస్తూ వ‌చ్చారు. ఇప్పుడు త‌నే నిర్మాత‌గా కొడుకుని ఇంట్ర‌డ్యూస్ చేయ‌డానికి ఆయ‌న స‌మాయ‌త్త‌మ‌య్యార‌ట‌. ఇంత‌కు ముందుకు శంర్ నిర్మాణంలో కాద‌ల్ (తెలుగులో ప్రేమిస్తే) సినిమా రూపొందిన సంగ‌తి తెలిసిందే. ఆ సినిమా భారీ విజయాన్ని సాధించింది. ఇప్పుడు కాద‌ల్‌కు సీక్వెల్ చేయాల‌నేది శంక‌ర్ ఆలోచ‌న‌. కాద‌ల్ సీక్వెల్‌లో శంక‌ర్ త‌న‌యుడు హీరోగా న‌టించ‌బోతున్నారంటూ సినీ వ‌ర్గాల్లో టాక్ వినిపిస్తోంది. మ‌రి శంక‌ర్ డైరెక్ట్ చేస్తాడా? అంటే క‌చ్చితంగా డైరెక్ట్ చేయ‌డు కానీ.. వెనుకుండి టీమ్‌ను న‌డిపిస్తార‌న‌డంలో సందేహం లేదు. మ‌రి శంక‌ర్ త‌న‌యుడు అర్జిత్ హీరోగా ఎలాంటి విజ‌యాన్ని ద‌క్కించుకుంటార‌నేది తెలియాలంటే కొన్ని రోజులు ఆగాల్సిందే. ఇక డైరెక్ట‌ర్ శంక‌ర్ విష‌యానికి వ‌స్తే.. ప్ర‌స్తుతం ఈయ‌న మెగా ప‌వ‌ర్ స్టార్ రామ్ చ‌ర‌ణ్ హీరోగా దిల్ రాజు, శిరీష్ నిర్మిస్తోన్న పాన్ ఇండియా మూవీని డైరెక్ట్ చేస్తున్నారు. ఈ సినిమా చిత్రీక‌ర‌ణ శ‌ర‌వేగంగా జ‌రుగుతోంది. ఈ సినిమాను వ‌చ్చే ఏడాది సంక్రాంతికి విడుద‌ల చేయాల‌నేది మేక‌ర్స్ ఆలోచ‌న‌. కియరా అద్వానీ హీరోయిన్‌గా న‌టిస్తోన్న ఈ చిత్రంలో సునీల్ కీల‌క పాత్ర‌లో న‌టిస్తున్నారు. ఇందులో చ‌ర‌ణ్ ఐఏఎస్ ఆఫీస‌ర్‌గానూ, ముఖ్య మంత్రిగానూ క‌నిపిస్తార‌ని టాక్ వినిపిస్తోంది.