Kodali Nani : సినిమాలెందుకు కిరాణా కొట్లు పెట్టుకోండి... నానికి కొడాలి నాని కౌంటర్!

తెలుగు చిత్ర కథానాయకుడు నానిపై ఆంధ్ర‌ప్ర‌దేశ్ మంత్రి కొడాలి కౌంట‌ర్ వేశారు. నాని హీరోగా న‌టించిన లేటెస్ట్ మూవీ ‘శ్యామ్ సింగ‌రాయ్‌’. సినిమా విడుద‌ల స‌మ‌యంలో ఏపీలోని థియేట‌ర్ టికెట్స్ రేట్ల‌పై నాని మాట్లాడుతూ పెద్ద థియేట‌ర్స్‌లో వ‌చ్చే క‌లెక్ష‌న్స్ కంటే ప‌క్క‌నున్న కిరాణా కొట్ల‌కే ఎక్కువ క‌లెక్ష‌న్స్ వస్తున్నాయ‌ని, సినిమా టికెట్ రేట్స్‌ను త‌గ్గించ‌డం ప్రేక్ష‌కుల‌ను అవ‌మానించిన‌ట్లేనిన అన్నారు. ఆ వ్యాఖ్య‌లు పెద్ద దుమారంగా మారాయి. ఆంధ్ర ప్ర‌దేశ్‌కు చెందిన నాయ‌కులు నాని తీరుని విమ‌ర్శించారు. అయితే రీసెంట్‌గానూ నాని టికెట్ రేట్స్‌పై మాట్లాడిన సంద‌ర్భం, అర్థం వేర‌ని, కానీ అది బ‌య‌ట‌కు వ‌చ్చిన తీరు పూర్తిగా మ‌రోలా ఉంద‌ని, నెగిటివ్‌గా తీసుకోవ‌ద్ద‌ని దిల్ రాజు కూడా వివ‌ర‌ణ ఇచ్చారు. అయితే ప్ర‌భుత్వ పెద్ద‌లు నాని చేసిన వ్యాఖ్య‌ల‌ను అంత సులువుగా మ‌ర‌చిపోలేక‌పోతున్నార‌ని తెలుస్తుంది. మంగ‌ళ‌వారం ఏపీ మంత్రి చేసిన వ్యాఖ్య‌లే అందుకు నిద‌ర్శ‌నంగా క‌నిపిస్తున్నాయి. ఏపీలో సినిమా థియేట‌ర్స్ టికెట్ రేట్స్‌.. నాని వ్యాఖ్య‌లపై కొడాలి నాని మాట్లాడుతూ ‘‘ టికెట్ రేట్స్‌ను మేం ఎక్క‌డా త‌గ్గించ లేదు. గ‌తంలో ఉన్న‌ట్లే కొన‌సాగుతున్నాయి. కోర్టుల ఆదేశాలతో సినిమా టికెట్ ధరలు పెంచి దోచుకునేందుకు మా ప్ర‌భుత్వం అవకాశం కల్పించలేదు. ప్ర‌త్యేక క‌మిటీ వేశాం. దాని ప్ర‌కారం ఉన్న టికెట్ రేటు కంటే ఎక్కువగా రేట్లు పెంచకుండా ప్రభుత్వం చర్యలు తీసుకుంది. మేం చేస్తోన్న దాని వల్ల ఎగ్జిబ్యూటర్ కు ఏలాంటి నష్టం లేదు. రాష్ట్రంలో అన్నీ థియేటర్స్‌లో క‌లిపి ల‌క్ష సీట్లు ఉంటే అందులో వెయ్యి సీట్లు కూడా ప‌ది రూపాయ‌ల టికెట్స్ ఉండ‌వు. మా ప్ర‌భుత్వానికి ఎవ‌రిపైనా క‌క్ష సాధింపు లేదు. కావాల‌నే కొంద‌రు రాష్ట్ర ప్ర‌భుత్వం బుర‌ద చ‌ల్లుతున్నారు. కిరాణా కొట్టుకు వ‌స్తున్న ఆదాయం కూడా సినిమా థియేట‌ర్స్‌కు రావ‌డం లేద‌ని కొంద‌రు అంటున్నారు. అంత ఆదాయం లేక‌పోతే సినిమా థియేట‌ర్స్ య‌జ‌మానులు కిరాణా కొట్టు పెట్టుకుంటారు క‌దా’’ అని హీరో నాని వ్యాఖ్యలపై కొడాలి నాని కౌంటర్ వేశారు. మరో వైపు ఏపీ ప్ర‌భుత్వం టికెట్ రేట్స్‌పై మాట్లాడ‌టానికి సినీ ప‌రిశ్ర‌మ నుంచి ఓ బృందాన్ని ర‌మ్మ‌ని చెప్పింది. త్వ‌ర‌లోనే ఈ బృందం మంత్రి పేర్ని నానితో బేటీ కానుంది. ఆ మీటింగ్ ఎప్పుడు ఉంటుంద‌నే వివ‌రాల‌ను త్వ‌ర‌లోనే తెలియ‌జేస్తామ‌ని దిల్ రాజు రీసెంట్‌గా జ‌రిగిన పాత్రికేయుల స‌మావేశంలో తెలియ‌జేశారు.