Pawan Kalyan: పవన్ జాతకం ప్రకారం రాజకీయాల్లో ఉండరు.. 2024 నాటికి జనసేన దుకాణం క్లోజ్: వేణు స్వామి సంచలనం

2024 ఎన్నికలే లక్ష్యంగా అధినేత పార్టీని బలోపేతం చేసే దశగా అడుగులు వేస్తున్నారు. విస్తృత స్థాయి సమావేశాలు నిర్వహిస్తూ జనసైనికుల్లో ఉత్సాహం నింపుతున్నారు. అయితే సొంత పార్టీని స్థాపించినప్పటికీ ఇప్పటివరకూ ఒంటిరిగా పోటీ చేసింది లేదు. టీడీపీ, బీజేపీ, బహుజన్ సమాజ్ పార్టీ, సీపీఎం-సీపీఐ ఇలా వివిధ పార్టీలతో పోటీ చేసి ఘోర పరాజయాన్ని చవి చూశారు. పార్టీ వ్యవస్థాపక అధ్యక్షుడిగా రెండుచోట్ల పోటీ చేసి ఓడిపోయారు పవన్ కళ్యాణ్. ఇక జనసేన తరుపున పోటీ చేసిన గెలిచిన ఒకే ఒక్క సీటు.. రాజోలు (రాపాక వరప్రసాద్)ని నిలుపుకోలేకపోయారు. ఆ ఒక్క ఎమ్మెల్యే కూడా జంపింగ్ జపాంగ్‌ల జాబితాలో చేరిపోయారు. అయితే నష్టనివారణ చర్యలు చేపట్టిన పవన్ కళ్యాణ్.. బీజేపీ పొత్తుతో 2024 ఎన్నికల్లో సీఎం కుర్చీ ఎక్కడానికి ప్రయత్నాలు ముమ్మరం చేస్తున్నారు. పవన్ పార్టీ బలోపేతం దిశగా అడుగులు వేస్తుంటే.. ఆయనకు రాజకీయాలు అచ్చు రావు.. త్వరలో ఆ పార్టీయే ఉండదంటూ జోస్యం చెప్పారు ప్రముఖ సినీ జోతిష్యుడు . సమంత-నాగచైతన్య విడిపోతారని.. అఖిల్‌కి పెళ్లే జరగదని.. చంద్రబాబు ఓడిపోతారని ముందే జోతిష్యం చెప్పి పాపులర్ అయిన వేణు స్వామి.. పవన్ కళ్యాణ్ జాతకం ప్రకారం ఆయనకు రాజకీయయోగం లేదని అంటున్నారు. ఆయన మాట్లాడుతూ.. ‘‘గత ఎన్నికలు కాదు.. వచ్చే ఎన్నికలు.. ఆ తరువాత రెండున్నర దఫాలు వైఎస్ జగన్ ముఖ్యమంత్రిగా ఉండబోతున్నారు. ఇందులో ఎలాంటి మార్పులు లేవు. ప్రస్తుతం ఉన్న పార్టీల లీడర్లు.. వాళ్ల నక్షత్రాలను బట్టి చూస్తే రాబోయే 15 సంవత్సరాలు జగన్ సీఎంగా ఉండబోతున్నారు. టీడీపీ, జనసేన పరిస్థితి ఏంటని ప్రశ్నిస్తే.. దానికి జోతిష్యం అవసరం లేదు.. సామన్య ప్రజలు కూడా వాళ్ల పరిస్థితి ఏంటో చెప్పేస్తారు. టీడీపీ పక్కన పెడితే జనసేన గురించి మాట్లాడాల్సిన అవసరమే లేదు. నేను ఇది చెప్తే వాళ్లేదో చేస్తారనే భయం నాకు లేదు.. నేను చనిపోడానికి కూడా రెడీ. పవన్ కళ్యాణ్ ఒక మాట మీద నిలబడే వ్యక్తి కాదు.. ఆయన జాతకమే అంత. ఓవైపు సినిమాలు అంటాడు.. మరోవైపు రాజకీయాలు అంటాడు. ఎక్కడా ఒకదానిపై ఉండరు. పవన్ కళ్యాణ్ రాజకీయాల్లో ఉండలేరని నేను చెప్పడం కాదు.. ఆయన జాతకమే చెప్తుంది. 2024 నాటికి పవన్ కళ్యాణ్ రాజకీయాల్లో ఉండరు. ఆయనే లేనప్పుడు పార్టీ ఎక్కడ ఉంటుంది అంటూ షాకింగ్ కామెంట్స్ చేశారు సినీ సినీ ఆస్ట్రాలజర్ వేణుస్వామి.