Mahesh Kathi: కత్తి మహేష్‌‌కి శస్త్ర చికిత్స పూర్తి.. అంతా సేఫ్, అవన్నీ పుకార్లే.. 3 వారాల్లో ఇంటికి

నెల్లూరు జిల్లాలో జరిగిన రోడ్డు ప్రమాదంలో మూవీ క్రిటిక్ కత్తి మహేష్‌కి ఘోర రోడ్డు ప్రమాదం జరిగిన విషయం తెలిసిందే. జూన్ 26 తెల్లవారుజామున ఆయన ప్రయాణిస్తున్న ఇన్నోవా కారు నెల్లూరు జిల్లా కొడవలూరు హైవే వద్ద లారీని ఢీకొట్టడంతో భారీ ప్రమాదం జరిగింది. ఈ యాక్సిడెంట్‌లో సీటు బెల్టు పెట్టుకోకపోవడం వల్ల తలతో పాటు కన్నుకి బలమైన గాయాలు అయ్యాయి. అయితే ఆయన్ని హుటాహుటిన దగ్గర్లోని హాస్పటల్‌కి తరలించగా.. ప్రాణాపాయం తప్పింది. అయితే మెరుగైన వైద్యం కోసం ఆయన్ని చెన్నై ఆసుపత్రికి తరలించి వైద్యం అందిస్తున్నారు. అయితే ప్రస్తుతం కత్తి మహేష్ ప్రాణానికి ఎలాంటి ప్రమాదం లేదు.. ఆయన ఆరోగ్యం విషయంలో ఆందోళన చెందాల్సిన పనిలేదని ఆయన సన్నిహితులు తెలియజేశారు. ఆంధ్రప్రదేశ్ సీఐడీ అడిషనల్ డీజీపీ, ఐపీఎస్ పీవీ సునీల్ సునీల్ కుమార్ ఆదేశాల మేరకు.. కొంతమంది దళిత నాయకులు చెన్నై వెళ్లి కత్తి మహేష్ ఆరోగ్య పరిస్థితిపై ఆరా తీశారు. వాళ్లు అందించిన వివరాల ప్రకారం.. కత్తి మహేష్ చాలా వరకూ కోలుకున్నారని.. ఆదివారం నాడు లిక్విడ్ ఫుడ్ కూడా తీసుకున్నట్టు తెలియజేశారు. అయితే కత్తి మహేష్ తల నుదిటి భాగంలో ఎముక విరిగిందని.. దానికి సోమవారం నాడు శస్త్ర చికిత్స జరిగిందన్నారు అయితే కంటికి బలమైన గాయం కావడంతో శంకర నేత్రాలయ వైద్యులు శస్త్ర చికిత్సకు ఏర్పాట్లు చేస్తున్నారు. ఈ సర్జరీలు పూర్తైన తరువాత మూడు వారాలు పాటు హాస్పటల్స్‌లో కత్తి మహేష్ ఉండాల్సి వస్తుందని వైద్యులు తెలిపినట్టు చెప్పారు. అయితే ఆయన కంటి చూపు పోయిందని.. ఇక కళ్లు రావని కొంతమంది పనికట్టుకుని ప్రచారం చేయడంతో వాటిని ఖండించారు కత్తి మహేష్ సన్నిహితులు. త్వరలో ఆయన కోలుకుని తిరిగి హైదరాబాద్‌కి రాబోతున్నట్టు తెలియజేశారు. కాగా ప్రమాదం జరిగి ప్రాణాపాయ స్థితిలో ఉన్న కత్తి మహేష్ పట్ల.. మానవత్వం చాటాల్సింది పోయి కొంతమంది పనికట్టుకుని ఆయన చనిపోయాడని.. చనిపోబోతున్నాడని.. కళ్లు పోయాయని ఇలా రకరకాల పుకార్లను సృష్టిస్తున్నారు. అయితే అవన్నీ కేవలం పుకార్లు మాత్రమే అని.. ఖండించారు ఆయన సన్నిహితులు. ఆదివారం నాడు కొంతమంది దళిత నాయకులు చెన్నై వెళ్లి కత్తి మహేష్‌ని పరామర్శించి.. ఆయన ఆరోగ్య విషయంలో ఆందోళన చెందాల్సిన అవసరం లేదని తెలియజేశారు.