‘సిద్ధార్త్ ఒక నేరస్థుడు, అతనిపై కోర్టులో కేసు నడుస్తుంది’ బీజేపీ స్పోక్స్‌పర్సన్ సెన్సేషనల్ కామెంట్స్

తమిళనాడు బీజేపీకి చెందిన కొందరు తన ఫోన్‌ నెంబర్‌ని లీక్ చేయడంతో వందల సంఖ్యలో బెదిరింపు కాల్స్ వస్తున్నాయంటూ నటుడు గురువారం ట్వీట్ చేసిన విషయం తెలిసిందే. తనని తన కుటుంబాన్ని చంపేస్తామంటూ వాళ్లు బెదిరిస్తున్నారని అతను పేర్కొన్నాడు. అంతేకాక.. అత్యాచారం చేస్తామని కూడా బెదిరింపులు వచ్చాయని.. అన్ని కాల్స్‌ని రికార్డు చేసి పోలీసులకు అందజేస్తానని అతను ట్వీట్‌లో పేర్కొన్నాడు. దీంతో పాటు తనకు వచ్చిన వేధింపులకు సంబంధించిన వాటిలో ఒకదాని స్క్రీన్ షాట్ తీసి అతను పోస్ట్ చేశాడు. దేశానికి వైరస్ నుంచి విముక్తి వస్తుంది కానీ.. ఇలాంటి వాళ్ల నుంచి విముక్తి రాదంటూ అతను వ్యాఖ్యానించాడు. తాను చేసిన ట్వీట్‌లో సిద్ధార్త్ ప్రధాన మంత్రి నరేంద్ర మోదీ, కేంద్ర హోం మంత్రి అమిత్ షాలను కూడా ట్యాగ్ చేశాడు. దీంతో దీన్ని తీవ్రంగా పరిణామించింది. సిద్దార్త్ తన ట్వీట్ల ద్వారా మోదీ, అమిత్ షాలను అవమానించాడు అంటూ తమిళనాడు బీజేపీ స్పోక్స్‌పర్సన్ నారాయణన్ తిరుపతి అన్నారు. ‘సిద్ధార్త్ అనే వ్యక్తి తరచూ నేరాలకు పాల్పడుతూ ఉంటాడు. గతంలో అతనిపై నేనే కేసు పెట్టాను.. ఆ కేసు ఇప్పుడు కోర్టులో ఉంది. తాజాగా అతను ప్రధాని మోదీ, హోం మంత్రి సీఎంలను దూషించి మరోసారి తప్పు చేశాడు. అతని లేటెస్ట్‌ ట్వీట్‌లో యోగి ఆదిత్యనాధ్‌ని కూడా దూషించాడు. అతనికి బెదిరింపులు నిజంగానే వస్తే.. దాన్ని చట్టపరంగా పరిష్కరించుకోవాలి. కానీ, ప్రధాని, హోం మంత్రి వంటి వారిని దూషించడం ఖండించదగిన చర్య’ అని నారాయణన్ అన్నారు. దీంతో పాటు బీజేపీ తమిళనాడు ఐటీ సెల్ వింగ్ హెడ్ నిర్మల్ కుమార్ కూడా దీనిపై స్పందించారు. బీజేపీ ఐటీ విభాగానికి చెందిన వ్యక్తులే తన ఫోన్ నెంబర్‌ని లీక్ చేశారు అంటూ సిద్ధార్త్ చేసిన ఆరోపణలను ఆయన తీవ్రంగా ఖండించారు. సిద్ధార్త్ చేస్తున్న ఆరోపణలకు తమకు ఎటువంటి సంబంధం లేదని ఆయన స్పస్టం చేశారు. ‘‘ఈ పాండమిక్ పరిస్థితుల్లో ప్రజలు ఎలా సహాయం చేయాలా, ఆహారం, వైద్యం ఎలా అందించాలో అనే విషయంపై దృష్టి పెట్టాలి. కాబట్టి సిద్ధార్త్ వంటి వ్యక్తులను పట్టించుకోవద్దని నేను అందరు మద్దతుదారులను కోరుతున్నాను. అతను కేవలం టామ్ పాస్ చేయడానికి ప్రయత్నిస్తున్నాడు’’ అంటూ నిర్మల్ కుమార్ ట్వీట్ చేశారు. తన ఫోన్ నెంబర్ ఆన్‌లైన్‌లో లీక్ కావడంతో ఒకే రోజులోనే ఐదు వందలకు పైగా బెదిరింపు కాల్స్ వచ్చాయంటూ సిద్ధార్త్ ట్వీట్‌లో పేర్కొన్నాడు. ఈ క్రమంలో తమిళనాడు పోలీసులు అతనికి భద్రత ఏర్పాటు చేశారు. అందుకు పోలీసులకు ధన్యవాదాలు తెలుపుతూ.. సిద్ధార్త్ మరో ట్వీట్ చేశాడు.