మా అమ్మ ఎంతగానో భయపడింది.. అవన్నీ చూపించాను.. ఫోన్ నంబర్ లీక్‌పై సిద్దార్థ్

హీరో సోషల్ మీడియాలో ఎంత దూకుడుగా ఉంటారో అందరికీ తెలిసిందే. సినిమాల పరంగా సిద్దార్థ్ ఇప్పుడు కాస్త స్లోగా ఉన్నా కూడా సోషల్ మీడియాలో మాత్రం ఫుల్ బిజీగా ఉంటారు. బీజేపీ, నరేంద్రమోడీల మీద విమర్శనాస్త్రాలు సందిస్తూ ఎప్పుడూ ట్వీట్లు పెడుతూనే ఉంటారు. అయితే సిద్దార్థ్ అలా పెట్టే ట్వీట్లు ఒక్కోసారి వివాదాస్పదంగా మారుతుంటాయి. బీజేపీ నాయకులు, సిద్దార్థ్ మధ్య ఎప్పుడూ కోల్డ్ వార్ జరుగుతూనే ఉంటుంది. అయితే ఈ క్రమంలో తాజాగా ఓ బీజేపీ నాయకురాలు సిద్దార్థ్ ఫోన్ నంబర్‌ను సోషల్ మీడియా వేదికగా లీక్ చేశారు. దీంతో సిద్దార్థ్ ఫోన్‌కు కొన్ని వందల కాల్స్, మెసెజ్‌లు వచ్చాయి. ఇందులో సిద్దార్థ్, అతని ఫ్యామిలీకి బెదిరింపులే వచ్చాయి. చంపేస్తాం, రేప్ చేసేస్తామంటూ బెదిరింపు కాల్స్ వచ్చాయని సిద్దార్థ్ తెలిపారు. అయితే అన్నింటిని రికార్డ్ చేశానని ఏ ఒక్కరినీ వదిలిపెట్టను అని సిద్దార్థ్ శపథం చేశారు. పోలీసులకు ఫిర్యాదు చేయబోతోన్నానని చెప్పుకొచ్చారు. అయితే ఈ మేరకు తమిళనాడు పోలీసులు సిద్దార్థ్‌కు రక్షణ కల్పించేందుకు రంగంలోకి దిగారు. ఈ క్రమంలో సిద్దార్థ్ తమిళ పోలీసులకు ధన్యవాదాలు తెలిపారు. ఇలాంటి ఘటనలు జరగడం, ఇలా అవ్వడం నా కుటుంబంలో ఇదే మొదటిసారి.. ఇలా నాకు రక్షణ కల్పించడం నాకు ఎంతో సంతోషంగా ఉంది.. కానీ అదేమీ వద్దు.. నాకు కేటాయించిన అధికారులను ప్రస్తుతం ఉన్న ఈ కరోనా పరిస్థితుల్లో వేరే పనులకు బదిలీ చేయండి.. ఆ అధికారుల సమయాన్ని మంచికి ఉపయోగించండి.. అని కోరారు. సిద్దార్థ్‌కు సోషల్ మీడియాలో ఎంతగానో మద్దతు లభిస్తోంది. మేం నీ వెంట ఉంటామంటూ మెసెజ్‌లు చేస్తున్నారు. ఈ ఘటనలన్నంటిని చూసిన తన తల్లి ఎంతగానో భయపడ్డారట. అయితే ఆమెకు ధైర్యం చెప్పేందుకు మీరు మద్దుతుగా చేస్తోన్న ట్వీట్లను చూపించాను.. మేం సాధారణ మధ్య తరగతి చెందిన మనుషులం.. మీరు ఇలా చెప్పే మాటలే మాకెంతో ధైర్యాన్ని ఇస్తాయ్ అంటూ సిద్దార్థ్ చెప్పుకొచ్చారు.