‘ఎలాంటి సహాయం కావాలన్నా.. ఆ ట్విట్టర్ ఖాతాని ఫాలో కండి’.. నెటిజన్లకు రాజమౌళి సలహా

‘ఆర్ఆర్ఆర్’ సినిమాకు సంబంధించిన అధికారిక ట్విట్టర్ ఖాతా గత కొంతకాలంగా చాలా యాక్టివ్‌గా ఉంటుంది. అయితే అందులో వాళ్లు సినిమా అప్‌డేట్‌లు ఇవ్వడం లేదు. కరోనా కారణంగా ఇబ్బందులు ఎదురుకుంటున్న వాళ్లకి తగిన సహాయం అందించేందుకు ఈ ట్విట్టర్ ఖాతా ద్వారా కృషి చేస్తున్నారు. కష్టాల్లో ఉన్నవారి వివరాలను తెలుసుకొని.. వారికి తగిన సహాయం అందేలా చేస్తున్నారు. దర్శకధీరుడు కూడా కరోనా కారణంగా ఇబ్బందులు పడుతున్న వారు ఎలాంటి సహాయం కావాలన్న ‘ఆర్ఆర్ఆర్’ ట్విట్టర్ ఖాతాని ఫాలో కావాలని సూచించారు. రెండో దశలో వ్యాప్తి భయంకరంగా ఉంది. ప్రతీ రోజు లక్షల సంఖ్యలో కేసులు నమోదు అవుతున్నాయి. వేలాది మంది ప్రాణాలు కోల్పోతున్నారు. ఈ ఉపద్రవంలో ప్రజలకు సహాయం చేసేందుకు సెలబ్రిటీలు ముందుకొస్తున్నారు. బయటకు వెళ్లే అవకాశం లేకపోవడంతో సోషల్‌మీడియా ద్వారా కష్టాల్లో ఉన్నవారి వివరాలు తెలుసుకొని.. తగిన సహాయం అందిస్తున్నారు. ఈ క్రమంలో తమకు సహాయం చేయాలంటూ రాజమౌళిని చాలా మంది నెటిజన్లు కోరారు. దీనిపై ఆయన ట్విట్టర్ ద్వారా స్పందించారు. ‘‘పరిస్థితులు చాలా కఠినంగా ఉన్నాయి. ఇలాంటి సమయంలో తగిన సహాయం అందించడానికి మా టీమ్ ప్రతీ క్షణం కష్టపడుతుంది. కరోనాకు సంబంధించి ఎటువంటి సహాయం కావాలన్ని ‘ఆర్ఆర్ఆర్’ ట్విట్టర్ ఖాతాని ఫాలో అవ్వండి. అందులో తగిన సమాచారం తెలుసుకోండి. మీరు మీ చుట్టుపక్కల వారికి సహాయం చేయండి’’ అంటూ రాజమౌళి ట్వీట్ చేశారు. ఇక ‘బాహుబలి’ వంటి గ్రాండ్ సక్సెస్ తర్వాత రాజమౌళి ‘ఆర్ఆర్ఆర్’ పేరుతో మరో ప్రతిష్టాత్మక ప్రాజెక్టును రూపొందిస్తున్నారు. ఈ సినిమాలో మన్యం వీరుడు అల్లూరి సీతారామ రాజు పాత్రలో రామ్ చరణ్, గిరిజన యోధుడు కొమురం భీమ్ పాత్రలో ఎన్టీఆర్ నటిస్తున్నారు. చరణ్‌కు జోడీగా ఆలియా భట్, ఎన్టీఆర్‌కు జోడీగా ఒలివియా మోరిస్ నటిస్తున్నారు. కరోనా వ్యాప్తి కారణంగా ప్రస్తుతం ఈ సినిమా షూటింగ్ నిలిచిపోయింది. అంతా సవ్యంగా జరిగితే వచ్చే సంక్రాంతికి సినిమా విడుదల అయ్యే అవకాశం ఉంది.