కరోనా ఎఫెక్ట్.. మై విలేజ్ షో అనిల్ వెరైటీ లగ్గం.. అంతా అందులోనే!

ప్రస్తుతం కరోనా ధాటికి అందరూ వణికిపోతోన్నారు. ఇక ఇప్పుడు రోజుకు కొన్ని లక్షల కేసులు నమోదు అవుతున్నాయి. రానున్న రోజుల్లో అది మరింత స్థాయికి చేరుకునేలా ఉన్నాయి. మే నెలలో కొన్ని లక్షల సంఖ్యలో వివాహాలు జరగబోతోన్నాయి. వీటిపై ఇప్పటికే ప్రభుత్వాలు మార్గదర్శకాలు విడుదల చేశాయి. అయితే కొంత మంది మాత్రం పెళ్లిళ్లను వాయిదా వేసుకుంటున్నారు. ఇంకొంత మంది ప్రభుత్వ నిబంధనలను అనుసరించి వివాహాలను జరపుకునేందుకు రెడీ అవుతున్నారు. అయితే తాజాగా కొత్త పద్దతిని ఎంచుకున్నారు. పెళ్లి శుభలేఖలోనే అన్నింటిని వివరించారు. లగ్గం ఏ పద్దతిలో జరుగుతుంది.. ఎలా జరుగుతుంది.. ఎలా వీక్షించాలి.. కట్నకానుకలు ఎలా చదివించాలో అన్నీ క్లియర్‌గా వెడ్డింగ్ కార్డ్‌లోనే వివరించారు. ప్రస్తుతం ఈ వెరైటీ వెడ్డింగ్ కార్డ్ ఓ రేంజ్‌లో వైరల్ అవుతోంది. శ్రీరస్తు.. శుభమస్తు.. అవిఘ్నమస్తు అంటూ ప్రారంభం కావాల్సిన శుభలేఖ.. శానిటైజర్ ఫస్టు.. మాస్క్ మస్టు.. సోషల్ డిస్టెన్స్ బెస్ట్ అంటూ కరోనా నిబంధనల గురించి రాసుకొచ్చారు. ఇక పెళ్లి కొడుకు, పెళ్లి కూతురు చదువు సంధ్యల విషయం చెప్పాల్సిన చోట.. కరోనా నెగెటివ్ అంటూ పరీక్షల ఫలితాన్ని చెప్పుకొచ్చారు. పెండ్లిని ఆన్‌‌లైన్‌లో చూసి ఆశీర్వదించి, ఎవరింట్లో వారే విందు తిని.. ఎవరింట్లో వాళ్లే పాటలు పెట్టుకొని బరాత్ డాన్స్ చేయాలని చెప్పుకొచ్చారు. కట్నాలు, కానుకలకు డిజిటల్ చెల్లింపులు చేయాలని.. అందుకు జీపే, ఫోన్ పే బార్ కోడ్ కూడా ప్రింట్ చేశారు. అలా వచ్చే కట్న కానుకలను కరోనాతో బాధపడుతున్న వారికి ఆర్థిక సాయంగా అందిస్తామని కూడా ఈ పెండ్లి పత్రికలో ముద్రించారు. మొత్తంగా ప్రస్తుత కరోనా పరిస్థితులకు అద్దం పట్టేలా ‘కరోనా కాలంలో లగ్గం పత్రిక’ అని పెళ్లి పత్రికపై రాసి నవ్వించే ప్రయత్నం చేసినా కూడా అందులో ఎన్నో విషయాలు దాగి ఉన్నాయి. ఇప్పుడున్న పరిస్థితుల్లో సమూహాలుగా ఒకే చోట ఉండటం ఎంతటి ప్రమాదకరమో అందరికీ తెలిసిందే.