మరో ప్రయోగానికి సిద్ధమైన రావు రమేశ్.. త్వరలో విభిన్నమైన పాత్రలో ప్రేక్షకుల ముందుకు..

1980-90 కాలంలో టాలీవుడ్‌లో విలన్ అంటే ముందుగా గుర్తొచ్చే పేరు రావు గోపాల్ రావుదే. ఎన్నో సినిమాల్లో అద్భుతంగా విలనిజం పండించిన ఆయన తెలుగు ప్రేక్షకుల మనస్సులో చిరస్థాయిలో నిలిచిపోయారు. విలనిజంతో పాటు.. అటు సపోర్టింగ్ పాత్ర అయినా.. కామెడీ పాత్ర అయినా.. ఆయన చేస్తే ఆ పాత్రకే వన్నె వచ్చేది. అయితే అంత గొప్ప నటడి వారసుడిగా తెలుగు ఇండస్ట్రీలోకి అడుగుపెట్టారు . ప్రస్తుతం ఉన్న సపోర్టింగ్ నటులలో ఆయన తనకంటూ ఓ ప్రత్యేకమైన స్థానం ఏర్పరచుకున్నారు. విభిన్నమైన బాడీ లాంగ్వేజీ, డైలాగ్ డెలివరీతో ఆయన ఎంతో మంది అభిమానులను సంపాదించుకున్నారు. అయితే ఇండస్ట్రీలో అడుగుపెట్టిన క్షణం నుంచి తండ్రి తగ్గ తనయుడు అని అనిపించుకోవాలని రావు రమేశ్ ప్రయత్నాలు చేస్తూనే ఉన్నారు. ఇప్పటికే ఆయనకి ఆ గుర్తింపు కూడా లభించింది. కానీ, ఆయన ప్రయోగాలు చేయడం మాత్రం మానేయలేదు. సినిమా సినిమాకి తన నటనలో వేరియేషన్ చూపిస్తూనే ఉన్నారు. అయితే ఇప్పుడు తన రాబోయే సినిమాలో ఓ సరికొత్త ప్రయోగంతో ప్రేక్షకుల ముందు వచ్చేందుకు సిద్ధమవుతున్నారట ఆయన. శర్వానంద్ హీరోగా ‘ఆర్ఎక్స్100’ ఫేమ్ అజయ్ భూపతి దర్శకత్వంలో ‘మహా సముద్రం’ అనే సినిమా రూపొందుతున్న విషయం తెలిసిందే. ఈ సినిమాలో హీరో సిద్ధార్త్ ఓ కీలక పాత్రలో నటిస్తున్నాడు. అయితే సినిమాలో రావు రమేశ్ విభిన్నమైన పాత్రలో కనిపించనున్నారట. కథ డిమాండ్ మేరకు ఆయన ఓ గూనివాడి పాత్రలో నటిస్తున్నారని టాక్. రావు రమేశ్ పాత్ర ఈ సినిమాకే హైలైట్‌గా నిలుస్తుందని అంటున్నారు. ఈ పాత్ర ద్వారా రావు రమేశ్ మూస పాత్రలకే పరిమితం అని తనపై ఉన్న అపవాదాన్ని రావు రమేశ్ చెరిపేస్తారని సన్నిహితులు అంటున్నారు. ఇక ఈ సినిమా స్క్రిప్ట్‌పై అజయ్ భూపతి దాదాపు రెండు సంవత్సరాలు వర్క్ చేశాడట. తన మొదటి చిత్రం ‘ఆర్‌ఎక్స్100’కు ఈ సినిమా పూర్తి భిన్నంగా ఉండనుందట. మాస్ ఆడియన్స్‌తో పాటు ఫ్యామిలీ ఆడియన్స్‌ని కూడా ఆకట్టుకొనేలా ఈ సినిమాను రూపొందిస్తున్నారని తెలుస్తోంది. ఇక ఈ సినిమాలో అదితి రావు హైదరి హీరోయిన్‌గా నటిస్తోంది. ఏకే ఎంటర్‌టైన్‌మెంట్స్ బ్యానర్‌పై అనిల్ సుంకర ఈ సినిమాని నిర్మిస్తున్నారు. చేతన్ భరద్వాజ్ సంగీతం అందిస్తున్న ఈ సినిమా ఈ ఏడాది ఆగస్టు 19న విడుదల అయ్యే అవకాశం ఉంది.