కత్తి మహేష్‌కు డబ్బు పంపుతున్న పవన్ ఫ్యాన్స్: పిచ్చ హ్యాపీ.. అసలేం జరుగుతోంది?

జనసేన అధినేత, ప్రముఖ సినీ నటుడు పవన్ కళ్యాణ్‌పై వీలు చిక్కినా, చిక్కకపోయినా విమర్శలు చేసే వ్యక్తి సినీ ఇండస్ట్రీలో ఒకే ఒక్కరు ఉన్నారు.. ఆయనే నటుడు, సినీ క్రిటిక్ ! అభిమానులు, కత్తి మహేష్‌కు మధ్య గతంలో పెద్ద యుద్ధమే నడిచింది. అప్పట్లో పవన్ గురించి తప్పుగా మాట్లాడొద్దంటూ ఆయన ఫ్యాన్స్ కత్తి మహేష్‌ను బెదిరించారు, రాజీకొచ్చారు, బతిమాలారు.. చివరికి విసుగొచ్చి అతడిని వదిలేశారు. కానీ, పవన్‌పై తన మాటల దాడిని మాత్రం కత్తి మహేష్ ఆపలేదు. రాజకీయంగా పవన్ నిర్ణయాలను చాలా తీవ్రంగా విమర్శించే కత్తి మహేష్.. ఒక్కోసారి కాస్త ఘాటుగా, కఠవుగా కూడా మాట్లాడుతుంటారు. ఇక కత్తి మహేష్‌ను తిట్టి, బెదిరించి లాభం లేదనుకున్నారో ఏమో గాని పవన్ కళ్యాణ్ అభిమానులు వినూత్నంగా నిరసనకు దిగారు. సాధారణంగా జనసైనికులు పవన్ కళ్యాణ్‌పై విమర్శలు చేసే వారిని డబ్బుకు అమ్ముడుపోయావని విమర్శిస్తుంటారు. కత్తి మహేష్‌ను కూడా వైసీపీకి అమ్ముడుపోయావని దుయ్యబడుతుంటారు. ఇందులో భాగంగా కత్తి మహేష్‌కు చిల్లర డబ్బు పంపించి నిరసన తెలపాలని భావించినట్లున్నారు. దీనిని కూడా కత్తి మహేష్ తనకు అనుకూలంగా మార్చుకున్నారు. తనకు చిల్లర డబ్బులు కాదని, ఆ పంపేదేదో, రూ. 100 లేక రూ. 1,000 పంపాలంటూ ఎద్దేవా చేశారు. ఈ మేరకు శనివారం రాత్రి కత్తి మహేష్ ఫేస్‌బుక్‌లో పోస్ట్ చేశారు. ‘‘అయ్యా పవన్ కళ్యాణ్ అభిమానులూ! నా గూగుల్ పే నంబర్. నా బ్యాంకు అకౌంట్ వివరాలు తెలుసుకుని నాకు 1 రూపాయి. 5 రూపాయలు పంపిస్తున్నారు. మీ ఉద్దేశం ఏమైనా గానీ.. సంతోషం. కానీ, పెరిగిన ద్రవ్యోల్బణం మరియు నా ఖర్చుల దృష్ట్యా ఆ పంపేదేదో 100 రూపాయలో, 1000 రూపాయలో పంపితే, కనీసం నా మందులో మంచింగ్ ఖర్చుకు పనికొస్తుంది. మీ పవర్ స్టార్ మానంమర్యాదలు నిలబడతాయి. ధన్యవాదాలు. ఇట్లు.. మీ చిల్లర అభిమానానికి పాత్రుడు.. కత్తి మహేష్.’’ అంటూ పోస్టు చేశారు. దీనిపై పవన్ అభిమానులు ఎలా రియాక్ట్ అవుతారో మరి!