ప్రభాస్ ‘ఆదిపురుష్’.. సీతగా కృతి సనన్ ఖరారు!

‘రాధే శ్యామ్’ తరవాత రెబల్ స్టార్ చేయబోతున్న భారీ చిత్రం ‘ఆదిపురుష్’. సుమారు రూ. 500 కోట్ల బడ్జెట్‌తో బహుభాషా చిత్రంగా రూపొందుతోన్న ఈ ఎపిక్ డ్రామా ప్రీ ప్రొడక్షన్ వర్క్ ప్రస్తుతం శరవేగంగా జరుగుతోంది. ఓం రౌత్ దర్శకత్వం వహిస్తోన్న ఈ సినిమాను టి-సిరీస్ అధినేత భూషన్ కుమార్ నిర్మిస్తున్నారు. అయితే, ఈ చిత్రంలో ప్రభాస్ సరసన సీతగా నటించడానికి బాలీవుడ్ నటి కృతి సనన్ ఖరారు చేశారని సమాచారం. ఈ సినిమాలో ప్రభాస్ రాముడిగా కనిపించనున్న సంగతి తెలిసిందే. బాలీవుడ్ నటుడు సైఫ్ అలీ ఖాన్ ప్రతికథానాయకుడిగా లంకేశ్ పాత్ర పోషిస్తున్నారు. అయితే, సీత పాత్ర పోషించబోయే నటిని ఇప్పటి వరకు ఖరారు చేయలేదు. సీత పాత్రను పోషించబోయే నటీమణుల జాబితాలో ఇప్పటి వరకు అనుష్క శెట్టి, అనుష్క శర్మ, కియారా అద్వానీ, కీర్తి సురేష్ పేర్లు వినిపించాయి. అయితే, కృతి సనన్‌ను ఫైనలైజ్ చేసినట్టు ముంబై మిర్రర్ స్పష్టం చేసింది. Also Read: నిజానికి కృతి సనన్ టాలీవుడ్ ద్వారానే వెండితెరకు పరిచయమయ్యారు. మహేష్ బాబు సరసన ‘1 నేనొక్కడినే’ సినిమాలో నటించి తెరంగేట్రం చేశారు. ఆ తరవాత అక్కినేని నాగచైతన్యతో ‘దోచేయ్’ సినిమాలో నటించారు. అనంతరం బాలీవుడ్‌కు చెక్కేసి అక్కడ బిజీ స్టార్ అయిపోయారు. కృతి సనన్ చేతిలో ప్రస్తుతం మూడు సినిమాలు ఉన్నాయి. అన్నీ షూటింగ్ దశలోనే ఉన్నాయి. ఇప్పుడు ‘ఆదిపురుష్’ లాంటి భారీ ఆఫర్ కృతి తలుపు తట్టింది. త్వరలోనే సీత పాత్రధారిగా కృతి సనన్‌ను పరిచయం చేయనున్నారట. వచ్చే ఏడాది జనవరి నుంచి ‘ఆదిపురుష్’ షూటింగ్ ప్రారంభమవుతుందని సమాచారం. ఒకటే సుధీర్ఘ షెడ్యూల్‌లో సినిమాను పూర్తి చేస్తారట. 3డిలో షూట్ చేయనున్న ఈ సినిమాకు సంబంధించి ప్రస్తుతం ఏర్పాట్లు జరుగుతున్నాయని తెలిసింది. షూటింగ్ చాలా వరకు స్టూడియోలోనే క్రోమా స్క్రీన్‌‌పై జరుగుతుందట. ‘అవతార్’, ‘స్టార్ వార్స్’ వంటి భారీ హాలీవుడ్ సినిమాలకు పనిచేసిన అంతర్జాతీయ స్థాయి వీఎఫ్ఎక్స్ టెక్నీషియన్స్‌ను ఇప్పటికే ఓం రౌత్, భూషన్ రంగంలోకి దించారని అంటున్నారు. రామాయణం ఆధారంగా రూపొందుతోన్న ఈ చిత్రాన్ని 2022 ఆగస్టు 11న హిందీ, తెలుగు, తమిళం, మలయాళం, కన్నడ భాషల్లో విడుదల చేయనున్నారు.