చిరంజీవి, నాగార్జున లాబీయింగ్ చేసుకున్నారు.. మాకు అన్యాయం చేశారు: నిర్మాత సంచలన వ్యాఖ్యలు

కరోనా వల్ల తీవ్రంగా నష్టపోయిన తెలుగు సినీ పరిశ్రమను ఆదుకోవడానికి తెలంగాణ ప్రభుత్వం ముందుకొచ్చిన సంగతి తెలిసిందే. తెలుగు సినీ కార్మికులను ఆదుకోవడంతో పాటు పరిశ్రమపై వరాల జల్లు కురిపించారు సీఎం కేసీఆర్. దీనికి కారణం మెగాస్టార్ , అక్కినేని సారథ్యంలో సినీ పెద్దలు కేసీఆర్‌తో చర్చలు జరపడమే. రూ.10 కోట్ల లోపు బడ్జెట్‌తో నిర్మితమయ్యే సినిమాలకు రాష్ట్ర జీఎస్టీ రీఎంబర్స్‌మెంట్ చేస్తామని కేసీఆర్ ప్రకటించడంతో నిర్మాతలు, నిర్మాణ సంస్థలు సీఎంకు ధన్యవాదాలు తెలిపారు. అయితే, కేసీఆర్ వరాల జల్లుపై తెలుగు ఫిలిం చాంబర్ ప్రొడ్యూసర్స్ సెక్టార్ చైర్మన్, నిర్మాత యేలూరు సురేంద్ర రెడ్డి సంచలన వ్యాఖ్యలు చేశారు. చిరంజీవి, నాగార్జున తమకు అన్యాయం చేశారని ఆరోపించారు. ఈ మేరకు ఒక బహిరంగ లేఖను విడుదల చేశారు. Also Read: ‘‘తెలంగాణ గవర్నమెంట్ సినిమా ఇండస్ట్రీకి వరాల జల్లు కురిపించిందని మా సినిమా పెద్దలు చంకలు కొట్టుకుంటున్నారు. చూస్తుంటే పెద్ద లాబీయింగ్ జరిగినట్లు ఉంది. పెద్ద హీరోలు, లీజు థియేటర్స్ వాళ్లు వారికి కావాల్సింది వాళ్ళు చేసుకున్నారు. 10 కోట్ల లోపు సినిమాకి జీఎస్టీ వాపస్ అన్నారు. పది కోట్ల రూపాయల సినిమాని చిన్న సినిమా అంటారా. రెండు నుంచి మూడు కోట్ల రూపాయల లోపు సినిమాలనే చిన్న సినిమా అంటారు. ఈ చిన్న సినిమాలకి జీఎస్టీ నెంబరే ఉండదు. సినిమాకి ఎంత లెక్క చూపిస్తామొ మనందరికీ తెలుసు. సంవత్సరంలో వచ్చే 200 సినిమాల్లో పెద్ద సినిమాలు, యావరేజ్ బడ్జెట్ సినిమాలు మహా అంటే 20 నుంచి 30 వరకు మాత్రమే. మిగిలిన 170 నుంచి 180 చిన్న సినిమాలు. ఇండస్ట్రీకి కొత్త టెక్నీషియన్స్‌ని, కొత్త ఆర్టిస్టులను తీసుకువచ్చేది, సామాజిక సృహ ఉన్న చిత్రాలని తీసేది ఈ చిన్న నిర్మాతలే. 30 వేల కార్మికులకు పని ఇచ్చి కాపాడేది ఈ 180 చిత్రాల నిర్మాతలే. అలాంటి చిన్న సినిమాలు తీసె నిర్మాతల నోట్లో మట్టి కొట్టారు. చిన్న చిత్రాల నిర్మాతలు మేం అడిగినవి మూడే మూడు. థియేటర్స్‌లో 2 గంటల షో కంపల్సరీ. చిన్న సినిమాల ప్రదర్శనకి థియేటర్లు అడిగాం, ఫ్రీ లొకేషన్స్ ఇవ్వమని అడిగాం. థియేటర్స్‌లో సినిమా ప్రదర్శన కోసం డిజిటల్ ప్రొవైడర్స్ అన్యాయంగా వారానికి 12 వేల రూపాయలు వసూలు చేస్తున్నారు. దానిని పరిష్కరించమన్నాం. చిన్న చిత్ర నిర్మాతలు అడిగిన వీటిని పక్కన పడేశారు. చిరంజీవి గారికి, నాగార్జున గారికి చిన్న నిర్మాతలు కనిపించడం లేదు. ఇండస్ట్రీ అంటే మీ ఇరవై సినిమాలు కాదు సార్. 180 సినిమాలు ఉన్నాయి. ఆ 180 నిర్మాతల శాపనార్థాలు మీరు తగిలించుకోకండి సార్. ఇండస్ట్రీ పెద్దలుగా వెళ్లి సంవత్సరంలో 180 చిత్రాలను తీస్తున్న చిన్న చిత్ర నిర్మాతలకి చాలా అన్యాయం చేశారు సార్. మీకు కావలసినవి మీరు లాబీయింగ్ చేసుకున్నారు. థ్యాంక్స్ సార్’’ అని లేఖలో సురేంద్ర రెడ్డి పేర్కొన్నారు. Also Read: