51 రోజులు హాస్పిటల్‌లో.. బిడ్డ ఎంత అవస్తపడ్డాడో: కంటతడి పెట్టిన జానకమ్మ

దిగ్గజ గాయకురాలు, పద్మ భూషణ్ ఎస్. జానకిని జానకమ్మ అని ప్రేమగా పిలిచేవారు ఎస్పీ బాలసుబ్రహ్మణ్యం. అందుకే ఆ బిడ్డ ఇక లేడు అన్న వార్తను ఆమె జీర్ణించుకోలేకపోతున్నారు. ఈ మధ్యే తన ఇంటికి వచ్చి భోజనం చేసి వెళ్లాడని గుర్తుచేసుకుని బాధపడుతున్నారు. మృతికి సంతాపం తెలియజేస్తూ ఒక వీడియోను జానకి విడుదల చేశారు. ఈ వీడియోలో బాలసుబ్రహ్మణ్యంతో తన అనుబంధాన్ని, జ్ఞాపకాలను ప్రేక్షకులతో పంచుకున్నారు. ఈ క్రమంలో ఆమె భావోద్వేగానికి గురయ్యారు. కంటతడి పెట్టుకున్నారు. ‘‘ఎస్పీ బాలసుబ్రహ్మణ్యాన్ని నేను మొట్టమొదటి చూసింది నెల్లూరు దగ్గర గూడూరులో. ఒక కాంపిటీషన్‌లో చూశాను. అక్కడ పిల్లల కాంపిటీషన్ పెట్టారు.. అప్పటికి బాలు చిన్నవాడు. కాంపిటీషన్‌లో గెలిచినవారికి బహుమతి ఇవ్వడానికి నన్ను పిలిచారు. నేను మద్రాసు నుంచి గూడూరుకి వెళ్లాను. ఆ కాంపిటీషన్‌లో గెలిచిన వాళ్లను పాడించారు. బాలసుబ్రహ్మణ్యం చాలా బాగా పాడాడు. చాలా మంచి గొంతు. ఎంత బాగుందంటే.. ఎవరినీ కాపీ చేయకుండా చాలా నేచురల్‌గా ఉంది. తనకంటూ భగవంతుడు ఒక గొంతు ఇచ్చాడు కదా.. ఆ గొంతులోనే పాడాడు. ఎవరినీ కాపీ చేయలేదు. ఎవరినీ కాపీ చేయకుండా నీ గొంతులోనే నువ్వు పాడావు, చాలా బాగుంది, సినిమాల్లో పాడావంటే గొప్పగా రాణిస్తావు నువ్వు, ఫేమస్ అయిపోతావు అని చెప్పాను.. దీవించాను. ఆ తరవాత ఈ విషయాన్ని ప్రతి ప్రోగ్రామ్‌లోనూ బాలసుబ్రహ్మణ్యం చెప్పేవాడు. జానకమ్మ గారు చెప్పారు.. నేను పైకొచ్చాను అని చెప్పేవాడు. గొప్పగా పాడారని ఎంతో మందికి నేను చెప్తాను. చెప్పినంత మాత్రాన అందరూ పైకొస్తారా? దానిలో అతని అదృష్టం ఉంది, భగవత్‌కృప ఉంది, తను చాలా బాగా పాడతాడు గనుక పైకొచ్చాడు’’ అని బాలుని జానకి గుర్తుచేసుకున్నారు. Also Read: బాలు మద్రాసు వచ్చిన తరవాత తామిద్దరం కలిసి ఎన్ని పాటలు పాడామో లెక్కలేదని జానకి అన్నారు. తెలుగు, తమిళం, కన్నడ, మలయాళం, హిందీ భాషల్లో తామిద్దరం కలిసి కొన్ని వేల డూయెట్లు పాడామని జానకి తెలిపారు. తామిద్దరం స్నేహితుల మాదిరిగా ఉండేవాళ్లమని, చాలా చనువుగా గొడవలు పడటం, అల్లరి చేయడం, పోట్లాడుకొని మళ్లీ కలుసుకోవడం చేసేవాళ్లమని జానకి గుర్తుచేసుకున్నారు. తామిద్దరం పాటలతో ఆడుకునే వాళ్లమని.. ఎవరు బాగా పాడతారు, ఎవరు గొప్ప అని తామిద్దరి మధ్య కాంపిటీషన్ ఉండేదని జానకి అన్నారు. బాలుతో కలిసి పనిచేసిన క్షణాలు జీవితంలో మరిచిపోలేనని జానకి భావోద్వేగానికి గుయ్యారు. ‘‘మూడు నెలల క్రితం ఒక ప్రోగ్రాం చేయడానికి బాలు మైసూరుకు వచ్చాడు. ప్రోగ్రాం చేయడానికి ముందు రోజు సాయంత్రం మా ఇంటికి వచ్చాడు. మా అబ్బాయితో నాతో చాలాసేపు మాట్లాడాడు. ఇక్కడే భోజనం చేశాడు’’ అని జానకి వెల్లడించారు. యాదృచ్ఛికంగా తన ఆఖరి ప్రోగ్రామ్ మైసూరులో చేశానని.. బాలు కూడా ఆఖరి ప్రోగ్రామ్ మైసూరులోనే చేశారని, మళ్లీ ఆ తరవాత ఆయన ఎక్కడా ప్రోగ్రామ్ చేయలేదని జానకి గుర్తుచేసుకుని భావోద్వేగానికి గురయ్యారు. ‘‘51 రోజులు హాస్పిటల్‌లో ఉండి నానా కష్టాలు పడ్డాడు. బిడ్డ ఎంత అవస్తపడ్డాడో. ఆఖరికి మనందరినీ వదిలేసి వెళ్లిపోయాడు. ఆయన ఆత్మకు శాంతి కలగాలని దేవుడిని ప్రార్థిస్తున్నాను’’ అని జానకి కంటతడి పెట్టారు.