నాని ఫుల్ బిజీ: టాలెంటెడ్ డైరెక్టర్స్‌తో సినిమాలు.. 2021 చివరి వరకు షెడ్యూల్ ఇదే!

‘జెర్సీ’, ‘గ్యాంగ్ లీడర్’ సినిమాలతో గతేడాదిని విజయవంతంగా ముగించిన నేచురల్ స్టార్ నాని.. ఈ ఏడాది ‘V’ సినిమా ద్వారా ప్రేక్షకుల ముందుకు వచ్చారు. కరోనా వల్ల థియేటర్లు మూతబడటంతో ఓటీటీ ద్వారా డైరెక్ట్‌గా ఆడియన్స్ ఇళ్లకే వచ్చేశారు అండ్ టీం. గతంలో ఎన్నడూ చూడని విధంగా కొత్త అవతారంలో ఈ సినిమాలో నాని కనిపించారు. రివేంజ్ తీర్చుకునే సీరియల్ కిల్లర్‌గా తనలోని మరో నటుడిని ఆవిష్కరించారు. ఈ సినిమాలో నటీనటులకు మంచి మార్కులు పడినా సినిమా మాత్రం పెద్దగా ఆకట్టుకోలేకపోయింది. ప్రస్తుతం నాని ‘టక్ జగదీశ్’ సినిమా షూటింగ్‌ను తిరిగి ప్రారంభించడానికి సిద్ధమవుతున్నారు. శివ నిర్వాణ దర్శకత్వంలో తెరకెక్కుతోన్న ఈ సినిమా చిత్రీకరణ లాక్‌డౌన్‌కు ముందు చాలా వరకు పూర్తయింది. త్వరలోనే షూటింగ్‌ను తిరిగి ప్రారంభించి మిగిలిన భాగాన్ని పూర్తిచేయనున్నారు. ఈ చిత్రంలో నాని సరసన రీతూ వర్మ, ఐశ్వర్య రాజేష్ హీరోయిన్లుగా నటిస్తున్నారు. 2017లో వచ్చిన హిట్ మూవీ ‘నిన్ను కోరి’ తరవాత నాని, శివ నిర్వాణ కాంబినేషన్‌లో వస్తోన్న సినిమా కావడంలో ‘టక్ జగదీశ్’పై అంచనాలు భారీగానే ఉన్నాయి. Also Read: ‘టక్ జగదీశ్’తో పాటు మరికొన్ని ఆసక్తికర ప్రాజెక్ట్‌లను నాని లైన్‌లో పెట్టారు. ప్రతిభావంతులైన దర్శకులతో నాని ఈ సినిమాలు చేస్తున్నారు. ‘టాక్సీవాలా’ దర్శకుడు రాహుల్ సంకృత్యాన్‌తో ‘శ్యామ్ సింగ రాయ్’ అనే సినిమాను నాని చేస్తున్నారు. ఇది నాని కెరీర్‌లో భారీ బడ్జెట్ మూవీ కాబోతోంది. కోల్‌కతా బ్యాక్‌డ్రాప్‌లో తెరకెక్కనున్న ఈ సినిమాలో నేచురల్ స్టార్ సరికొత్తగా కనిపించనున్నారట. ఈ పాత్ర కోసం నాని లుక్ టోటల్‌గా మారనుందని సమాచారం. ఇక, తన 28వ సినిమాను ‘బ్రోచేవారెవరురా’ దర్శకుడు వివేక్ ఆత్రేయతో నాని చేస్తున్నారు. ఔట్ అండ్ ఔట్ ఎంటర్‌టైనర్‌గా తెరకెక్కనున్న ఈ సినిమాను మైత్రీ మూవీ మేకర్స్ సంస్థ నిర్మించనుంది. ఈ ప్రాజెక్ట్‌లు అటుంచుతే నాని తన 29వ సినిమాను కూడా అంగీకరించినట్టు సమాచారం. ‘ఏజెంట్ సాయి శ్రీనివాస ఆత్రేయ’ దర్శకుడు స్వరూప్ ఆర్‌జేఎస్‌తో ఈ సినిమాను నాని చేయనున్నారు. ఈ ప్రాజెక్ట్ 2021 ఆఖరిలో సెట్స్‌పైకి వెళ్లనుందని తెలిసింది. ప్రస్తుతం స్వరూప్ నిధి అన్వేషణ నేపథ్యంలో ఒక సినిమా చేస్తున్నారు. అది పూర్తికాగానే నాని సినిమా చేసే అవకాశం ఉంది. అలాగే, ‘సాయి శ్రీనివాస్ ఆత్రేయ’ను ట్రైలజీగా కూడా తెరకెక్కించే పనిలో స్వరూప్ ఉన్నారు.