హీరో సుధాకర్ దంపతుల డ్యాన్స్‌కు మెగాస్టార్ ఫిదా.. హారికకు ఎక్కువ మార్కులు వేసిన చిరు
‘లైఫ్ ఈజ్ బ్యూటిఫుల్’ సినిమాలో పక్కా తెలంగాణ కుర్రాడు నాగరాజుగా కనిపించిన సుధాకర్ కోమాకులను తెలుగు ప్రేక్షకులు అంత సులభంగా మరిచిపోరు. తొలి సినిమాతోనే ఆయన అలాంటి ఇంపాక్ట్ క్రియేట్ చేశారు. అయితే, ఆ తరవాత హీరోగా మారినా పెద్దగా ఆకట్టుకోలేకపోయారు. సుధాకర్ చివరిగా 2017లో ‘నువ్వు తోపురా’ సినిమాతో ప్రేక్షకుల ముందుకు వచ్చారు. ప్రస్తుతం ఆయన భార్య హారికతో కలిసి అమెరికాలో ఉంటున్నారు. ఇదిలా ఉంటే, ఆగస్టు 22న మెగాస్టార్ పుట్టినరోజు సందర్భంగా ఆయనకు సుధాకర్ దంపతులు అదిరిపోయే గిఫ్ట్ ఇచ్చారు. చిరంజీవి ‘ఛాలెంజ్’ సినిమాలోని సూపర్ హిట్ సాంగ్ ‘ఇందువదన’ను సుధాకర్ దంపతులు రీ-క్రియేట్ చేశారు. ఆ పాటకు ఇద్దరూ స్వయంగా డ్యాన్స్ చేసి ఆ వీడియోతో చిరంజీవికి ట్రిబ్యూట్ ఇచ్చారు. ఈ వీడియోకు మెగా అభిమానుల నుంచి విశేష స్పందన వచ్చింది. సుధాకర్, హారిక అద్భుతంగా పాటను రీ-క్రియేట్ చేశారని కొనియాడారు. అయితే, మిస్టర్ అండ్ మిసెస్ సుధాకర్ కోమాకుల పెర్ఫార్మె్న్స్‌కు మెగాస్టార్ చిరంజీవి కూడా ఫిదా అయిపోయారు. ఆ వీడియోను చూసిన చిరంజీవి ఎంతో సంతోషంగా సుధాకర్ దంపతులకు వాయిస్ మెసేజ్‌ను పంపారు. ఈ వాయిస్ మెసేజ్‌ను సుధాకర్ సోషల్ మీడియా ద్వారా పంచుకున్నారు. ఈ వీడియోలో చిరంజీవి మాట్లాడుతూ సుధాకర్, హారిక డ్యాన్స్ పెర్ఫార్మెన్స్ వాళ్లు ఊహించిన దాని కంటే తనను ఎంతో సంతోషానికి గురిచేసిందని అన్నారు. సుధాకర్ స్వతహాగా హీరో కాబట్టి డ్యాన్స్ చేయగలడని.. కానీ, ఆయన భార్య హారిక ఒక టెక్కీ అయ్యుండీ అద్భుతంగా డ్యాన్స్ చేసిందని చిరు కొనియాడారు. చిరంజీవి పూర్తి వాయిస్ మెసేజ్‌ను ఈ ట్వీట్‌లో వినొచ్చు..
Comments
Post a Comment