బిగ్ బాస్ 4 ఆఫర్‌ను రిజెక్ట్ చేసిన కొరియోగ్రాఫర్ దంపతలు

ప్రముఖ రియాలిటీ షో సీజన్ 4 మరికొద్ది రోజుల్లో ప్రారంభమవుతుంది. అక్కినేని నాగార్జున వరుసగా రెండోసారి హోస్ట్‌గా వ్యవహరిస్తోన్న ఈ సీజన్ సెప్టెంబర్ 6 నుంచి ప్రసారం కానుంది. ఈ నాలుగో సీజన్ కోసం బిగ్ బాస్ అభిమానులు ఆసక్తిగా ఎదురుచూస్తున్నారు. దీనికి తోడు టీజర్2లో నాగార్జున కొడుకు, తండ్రి, తాతయ్య.. ఇలా మూడు పాత్రల్లో కనిపించడంతో ఈసారి షో ఎలా ఉండబోతోందో అనే ఆసక్తి పెరిగింది. అంతేకాదు, ఈసారి హౌజ్‌లోకి వెళ్లే కంటెస్టెంట్ల విషయంలోనూ రకరకాల జాబితాలు ప్రచారంలో ఉన్నాయి. ఇదిలా ఉంటే, గత సీజన్ మాదిరిగానే ఈసారి కూడా ఒక పాపులర్ సెలబ్రిటీ జంట బిగ్ బాస్ హౌజ్‌లోకి వెళ్లబోతోందని ప్రచారం జరుగుతుందో. ప్రముఖ కొరియోగ్రాఫర్ రఘు మాస్టర్, ఆయన సతీమణి ప్రణవి జంటగా బిగ్ బాస్ హౌజ్‌లోకి వెళ్లబోతున్నారని సోషల్ మీడియాలో వదంతులు పుట్టుకొచ్చాయి. ఇది నిజమేనంటూ ఇండస్ట్రీ వర్గాల నుంచి కూడా సమాచారం వచ్చింది. అయితే, ఈ రూమర్స్‌పై తాజాగా రఘు మాస్టర్ స్పందించారు. తాను బిగ్ బాస్ షోలో పాల్గొనడం లేదని స్పష్టం చేశారు. ‘‘నాకు బిగ్ బాస్ సీజన్ 4లో పాల్గొనే అవకాశం వచ్చింది. కానీ, వ్యక్తిగత కారణాల వల్ల నేను ఆ ఆఫర్‌ను తిరస్కరించాను’’ అని రఘు మాస్టర్ వెల్లడించారు. రాబోయే బిగ్ బాస్ సీజన్ గత సీజన్లతో పోలిస్తే మరింత ఎంటర్‌టైనింగ్‌గా ఉంటుందని అంటున్నారు. ఈ సీజన్‌లో టీవీ నటులు, డైరెక్టర్లు, సోషల్ మీడియా ఇన్‌ఫ్లుయెన్సర్లు, ఇంటర్నెట్‌లో సెన్సేషన్ క్రియేట్ చేసినవారు పాల్గొంటున్నట్టు సమాచారం. ఇప్పటి వరకు బయటికి వచ్చిన సమాచారం మేరకు.. కొరియోగ్రాఫర్ నుంచి దర్శకుడిగా మారిన అమ్మ రాజశేఖర్, యూట్యూబ్‌లో పాపులర్ అయిన గంగవ్వ, సోషల్ మీడియా ఇన్‌ఫ్లుయెన్సర్ మెహబూబ్ షేక్, యూట్యూబ్ యాంకర్ దేత్తడి హారిక, డైరెక్టర్ సూర్య కిరణ్, నటి మోనాల్ గజ్జర్, న్యూస్ ప్రెజెంటర్ దేవి, నటి కరాటే కళ్యాణి, సింగర్ నోయల్, జబర్దస్త్ ఫేమ్ అవినాస్, టీవీ యాంకర్ లాస్య మంజునాథ్, వీజే అరియానా గ్లోరీ, టీవీ నటులు తనూజ పుట్టస్వామి, సయ్యద్ సొహైల్‌ బిగ్ బాస్ కంటెస్టెంట్లుగా హౌజ్‌లోకి అడుగుపెడుతున్నారు.