యాంకర్ సుమ కన్నీటి పర్యంతం.. చేతిలెత్తి మొక్కుతూ భావోద్వేగ వీడియో

‘‘మనం బాగున్నాం.. మనం సంతోషంగా ఉన్నాం అని మాత్రమే కాకుండా ఎదుటి వారికి కూడా సాయం చేయాలని ముందుకు వస్తున్న మీ పెద్ద మనసులకు శతకోటి వందనాలు’’ అంటూ కన్నీటి పర్యంతం అయ్యారు యాంకర్ సుమ కనకాల. లాక్ డౌన్ కారణంగా తిండిలేక ఇబ్బందులు పడుతున్న అనేక మందికి తన వంతు సాయం అందించిన సుమ కనకాల మరో అడుగు ముందుకు వేశారు. ప్రతిరోజు ఎంతో మంది పేదలకు అన్నం పెడుతూ వారి ఆకలి తీర్చుతున్న ‘అక్షయపాత్ర’ స్వచ్ఛంద సేవా సంస్థకు ఫండ్ అందించే కార్యక్రమానికి పిలుపునిచ్చారు సుమ. సుమ ఫండ్ రైజర్ ఫర్ అక్షయ పాత్ర పేరుతో ఫేస్ బుక్ ద్వారా ఆమె అభిమానుల నుంచి విరాళాలు సేకరిస్తున్నారు. ఐదు లక్షల టార్గెట్‌గా ఆమె ఈ విరాళాల సేకరణ ప్రారంభించగా.. ఒక్కరోజులోనే సుమ ఫండ్ రైజర్‌కు ఇప్పటి వరకూ ₹561,350 రావడంతో ఆమె టార్గెట్‌ను రీచ్ అయ్యారు. ఈ సందర్భంగా తన పిలుపుకు గౌరవం ఇస్తూ విరాళాలు ఇచ్చిన ప్రేక్షకులకు ధన్యవాదాలు తెలుపుతూ కన్నీళ్లు పెట్టుకున్నారు యాంకర్ సుమ. తన కన్నీటి నుంచి వచ్చే ఈ కన్నీళ్లు ఆనందంలో వచ్చేవని చెప్తూ.. ‘సుమ ఫండ్ రైజర్ ఫర్ అక్షయ పాత్ర’కు డొనేషన్లు పంపినవారి పేర్లు ఒక్కొక్కటిగా చదివి వినిపించారు సుమ. ఇక అక్షయపాత్ర సేవా సంస్థ గురించి చెప్తూ.. ‘ఈ సంస్థ ద్వారా దేశ వ్యాప్తంగా పిల్లలు, పేదలకు ప్రతిరోజు రెండు పూటలా అన్నం పెడుతున్నారని, ఈ క్లిష్టపరిస్థితుల్లో కూడా అందిస్తున్నారు. ఒక్కచోటే కాకుండా దేశ వ్యాప్తంగా ‘అక్షయ పాత్ర’ ద్వారా అన్నం పెడుతున్నారు. ఒక్క తెలంగాణ ప్రాంతంలో 300 సెంటర్లలో 9000 వేల మందికి మీల్స్ అందిస్తున్నారు. ఇంతకు ముందు డిన్నర్ ఉండేది కాదు.. ఇప్పుడు డిన్నర్ కూడా పెడుతున్నారు. తెలంగాణ ప్రభుత్వం- అక్షయ పాత్రతో కలిసి రూ.5 రూపాయిల భోజనం అందిస్తున్నారు’ అంటూ చెప్పుకొచ్చారు యాంకర్ సుమ. కాగా ఈ ‘సుమ ఫండ్ రైజర్ ఫర్ అక్షయ పాత్ర’ కు డొనేట్ చేయాలనుకునే వాళ్లు సుమ ఫేస్ బుక్‌కి వెళ్లి ఆమె పేజ్‌లో ఉన్న వీడియో కింద డొనేట్ బటన్‌‌పై క్లిక్ చేసి ఎప్పుడైనా విరాళం అందించవచ్చని.. ఈ మొత్తం అక్షయ పాత్ర సేవా సంస్థకు అందుతుందని వివరాలను తెలియజేశారు సుమ.