‘హిట్’ స్నీక్ పీక్: ఉత్కంఠ రేపుతోన్న మర్డర్ మిస్టరీ

విశ్వక్ సేన్ హీరోగా నేచురల్ స్టార్ నాని నిర్మించిన చిత్రం ‘హిట్’. ‘ది ఫస్ట్ కేస్’ అనేది ఉప శీర్షిక. రుహానీ శర్మ హీరోయిన్‌గా నటించారు. డాక్టర్ శైలేష్ కొలను ఈ చిత్రం ద్వారా దర్శకుడిగా పరిచయమవుతున్నారు. నాని స్థాపించిన వాల్ పోస్టర్ సినిమా నుంచి వస్తోన్న రెండో చిత్రం కావడంతో ‘హిట్’పై ఇప్పటికే అంచనాలున్నాయి. ఇటీవల జరిగిన ప్రీ రిలీజ్ ఈవెంట్‌లో ఎస్.ఎస్.రాజమౌళి చెప్పిన మాటలు ఈ సినిమాపై అంచనాలను మరింత పెంచాయి. ఒక సినిమాలోని కీలక ఘట్టాన్ని ముందుగానే చెప్పేసి ఆ తరవాత ఏం జరుగుతుందనే ఉత్కంఠను క్రియేట్ చేసి ప్రేక్షకులను థియేటర్లకు రప్పించడం హాలీవుడ్ సినిమా ‘2012’లో చూశానని.. మళ్లీ ఇప్పుడు ‘హిట్’ విషయంలో చూస్తున్నానని రాజమౌళి అన్నారు. నిజంగానే ‘హిట్’ టీమ్ ఆ ఉత్కంఠను ప్రేక్షకులకు కలుగజేస్తున్నారు. ‘హిట్’ సినిమా ఈనెల 28న విడుదలవుతోన్న విషయం తెలిసిందే. విడుదల తేదీ దగ్గరపడుతుండటంతో సినిమాపై ప్రేక్షకుల్లో ఆసక్తిని పెంచడానికి ‘స్నీక్ పీక్’ పేరిట ఒక వీడియోను మంగళవారం విడుదల చేశారు. Also Read: 4 నిమిషాల 39 సెకెన్ల నిడివి ఉన్న ఈ వీడియో చాలా ఆసక్తికరంగా ఉంది. నిజంగానే సినిమాలో ఏం చూపించబోతున్నారనే ఉత్కంఠను కలిగించింది. విక్రమ్ రుద్రరాజు అనే పోలీసు అధికారి పాత్రలో విశ్వక్ సేన్ కనిపించారు. డెడ్ బాడీ కోసం స్థానిక పోలీసులు చేస్తున్న సెర్చ్ ఆపరేషన్‌కు విక్రమ్ సహాయం చేస్తాడు. అక్కడున్న పోలీసులు కనిపెట్టలేని డెడ్ బాడీని.. తన తెలివితేటలతో విక్రమ్ సులభంగా కనిపెడతాడు. అయితే, డెడ్ బాడీని బయటికి తీస్తున్నప్పుడు విక్రమ్ కాస్త ఎమోషనల్ అవుతాడు. డిప్రెషన్‌కు లోనవుతాడు. గతంలో జరిగిన సన్నివేశం ఆయనకు గుర్తుకువస్తుంది. Also Read: మరి, విక్రమ్ జీవితంలో జరిగిన ఆ ఘటన ఏమిటి? ఆ ఘటనకు ఇప్పుడు జరిగిన మర్డర్‌కు సంబంధం ఏమిటి? ఇలా ఎన్నో ప్రశ్నలు తలెత్తుతున్నాయి. ఈ ప్రశ్నలన్నింటికీ రేపు సినిమాలో సమాధానం దొరకుతుంది. అయితే, ఈ సినిమాకు విశ్వక్ సేన్ మేనరిజం కూడా ప్లస్ కానుంది. ఆయన స్టైల్ ఈ స్నీక్ పీక్‌లోనే స్పష్టంగా కనిపిస్తోంది. ఇక థియేటర్‌లో దద్దరిల్లిపోవడం ఖాయం.