ఫేస్ బుక్‌లో ఫోన్ నెంబర్.. నటి నందినిపై పోలీసు కేసు!

సోషల్ మీడియా యాక్టివ్ అయిన తరువాత సెలబ్రిటీలు ఫ్యాన్స్‌కి అందుబాటులో ఉంటున్నారు. తమ పర్శనల్ విషయాలతో పాటు సినిమాలు, సీరియల్స్, ప్రోగ్రామ్స్ ఇలా రెగ్యులర్ అప్డేట్స్‌ను ఎప్పటికప్పుడు అందుబాటులో ఉంచడానికి ఫేస్ బుక్, ట్విట్టర్, ఇన్ స్టాగ్రామ్ వంటి సమాచార మాధ్యమాలను ఉపయోగిస్తున్నారు. అయితే వీటిని సక్రమమైన పద్దతిలో ఉపయోగించుకోకపోతే పరిస్థితి పోలీసు కేసుల వరకూ వెళ్తుంది అనడానికి ఈ ఘటనను ఉదాహరణగా చెప్పొచ్చు. సరవనన్ మీనాక్షి, కలక్క పోవత్తు యారు, కళ్యాణం ముదాల్ కాదల్ వారై వంటి తమిళ సీరియల్స్‌తో పాపులర్ టీవీ నటిగా పేరు సంపాదించిన మైనా నందినిపై తమిళనాడు కేసు నమోదైంది. ఆమె వ్యక్తిగత ఫేస్ బుక్ అకౌంట్‌లో చేసిన తప్పుకు ఆమెపై పోలీసులు కేసు నమోదు చేశారు. ఇటీవల నందిని తన పేరుతో ఓ నకిలీ ఫేస్ బుక్ ఖాతా ఓపెన్ చేశారు. అయితే ఆమె నంబర్‌కి బదులుగా ఈరోడ్ జిల్లా, అందియూర్‌ సమీపంలోని అన్నామడులై గ్రామానికి చెందిన గురునాథన్‌ అనే వ్యక్తి ఫోన్ నెంబర్‌ను ఆ ఫ్రేస్ బుక్ ప్రొఫైల్‌లో ఇచ్చారు నందిని. సమత్తువ మక్కళ్‌ కట్టి కార్యదర్శిగా బాధ్యతలు నిర్వర్తిస్తున్న గురునాథన్‌‌కు పగలు రాత్రి కాకుండా వరుసగా ఫోన్లు వస్తుండటంతో ఫేస్ బుక్‌లో తన ఫోన్ నంబర్‌ని ఇచ్చిందని తెలుసుకుని పోలీసులకు ఫిర్యాదు చేశాడు. దీంతో రంగంలోకి దిగిన పోలీసులు మైనా నందినిపై కేసు నమోదు చేసి దర్యాప్తు మొదలుపెట్టారు. ఇంతకీ ఆమె కావాలనే అతని ఫోన్ నంబర్ ఇచ్చిందా? లేక పొరపాటుగా జరిగిందా? అన్నది పోలీసుల విచారణలో తేలాల్సి ఉంది.