మనవరాలితో మెగాస్టార్.. శాంతా లిటిల్ గిఫ్ట్ ఎంత ముద్దుగుందో!
మెగాస్టార్ చిరంజీవి ప్రస్తుతం తన కుటుంబంలో మూడో తరాన్ని చూస్తున్నారు. ఒకప్పుడు సినిమాలతో బిజీగా ఉంటూనే తన పిల్లలతో ఆడుకున్న చిరంజీవి.. ఇప్పుడు తన పిల్లల పిల్లలతో సరదాగా గడుపుతున్నారు. మనవరాళ్లతో ఆడుకుంటున్నారు. తన చిన్న మనవరాలు, శ్రీజ-కళ్యాణ్ దేవ్ దంపతుల గారాలపట్టి నవిష్కను చిరంజీవి ఎత్తుకున్న ఫొటో ఒకటి తాజాగా బయటికి వచ్చింది. తాతయ్య ఒళ్లో కూర్చొని ఆ చిన్నారి పాప ఎంతో ఆనందపడిపోతోంది. నవిష్క గతేడాది సరిగ్గా క్రిస్మస్ రోజున (డిసెంబర్ 25న) జన్మించింది. అంటే, బుధవారం ఆమె తొలి పుట్టినరోజు. కొణిదెల వారింట పండగరోజు. ఈ వేడుకను కుటుంబ సభ్యులు ఎంతో వేడుకగా జరుపుకున్నారు. నవిష్క పుట్టినరోజు వేడుకలో పాల్గొన్న చిరంజీవి మనవరాలిని ఎత్తుకుని మురిసిపోయారు. ఈ ఫొటోను చిరంజీవి పెద్ద కుమార్తె సుష్మిత కొణిదెల ఇన్‌స్టాగ్రామ్‌లో పోస్ట్ చేశారు. ‘‘నా చిన్నారి పాపాయికి తొలి పుట్టినరోజు శుభాకాంక్షలు. మా అందరికీ శాంతా ఇచ్చిన బహుమతి ఈమె’’ అని పోస్ట్‌లో సుష్మిత పేర్కొన్నారు. మరోవైపు, నవిష్క తండ్రి కళ్యాణ్ దేవ్ కూడా తన కుమార్తె బర్త్‌డే సెలబ్రేషన్స్ ఫొటోలను ఇన్‌స్టాగ్రామ్‌లో పోస్ట్ చేశారు. ఈ ఫొటోల్లో నవిష్క చాలా ముద్దుగా ఉంది. ముఖ్యంగా ఊదారంగు గౌనులో అయితే మెరిసిపోతోంది. ఒక సంవత్సరం ఇంత వేగంగా గడిచిపోయిందంటే అస్సలు నమ్మలేకపోతున్నానని కళ్యాణ్ దేవ్ పేర్కొన్నారు. ఒకానొక రోజున తన కుమార్తె మహిళగా మారినా.. ఆమె తొలి నవ్వులు, ఏడుపు తనకు ఎప్పటికీ గుర్తుండిపోతాయని చెప్పారు. శ్రీజ కూడా తన కుమార్తె ఫొటోలను ఇన్‌స్టాగ్రామ్‌లో పోస్ట్ చేశారు.
Comments
Post a Comment