Allu Arjun: ‘అల.. వైకుంఠపురములో’.. కాస్త రిలాక్స్

సంక్రాంతి పండుగ నాడు బాక్సాఫీస్ దుమ్ముదులిపేందుకు స్టైలిష్ స్టార్ ‘’ చిత్రంతో ప్రేక్షకుల ముందుకు వస్తున్నారు. మాటల మాంత్రికుడు త్రివిక్రమ్ శ్రీనివాస్ తెరకెక్కించిన ఈ మూవీలో పూజా హెగ్డే హీరోయిన్‌గా నటించగా.. సుశాంత్, నవదీప్, నివేదా పేతురాజు, టబు, సునీల్, నవదీప్, రాజేంద్రప్రసాద్, సత్యరాజ్, సముద్రఖని, సచిన్ ఖేడ్కర్, మురళీశర్మ, రావు రమేష్ ఇలా చెప్పుకుంటూ పోతే స్క్రీన్‌ సరిపడనంతమంది భారీ క్యాస్టింగ్‌తో ఈ ‘అల వైకుంఠపురాన్ని నింపేశాడు మాటల మాంత్రికుడు. అసలే సంక్రాంతి అందులోనే మహేష్ బాబు ‘సరిలేరు నీకెవ్వరూ’ మూవీ రేస్‌లో ఉండటంతో పక్కా ప్లానింగ్‌తో ‘అల వైకుంఠపురములో’ చిత్రానికి అన్ని కార్యక్రమాలను చక్కబెడుతున్నారు. కాగా శనివారం నాటితో ఈ మూవీ షూటింగ్ కంప్లీట్ చేసుకుని గమ్మడికాయ కొట్టేసింది. ఈ సందర్భంగా షూటింగ్ కంప్లీట్ అంటూ .. పూజాతో కలిసి స్టెప్పులు వేస్తున్న ఫొటో పోస్టర్‌ని విడుదల చేసింది చిత్ర యూనిట్. మొత్తానికి షూటింగ్ పూర్తి కావడంతో నటీనటులకు రిలీఫ్ దొరికింది. బన్నీ, త్రివిక్రమ్‌ కాంబినేషన్‌లో వచ్చిన సన్నాఫ్ సత్యమూర్తి, జులాయి చిత్రాలు బ్లాక్ బస్టర్ హిట్స్ కావడంతో ‘అల.. వైకుంఠపురములో’ చిత్రంతో హ్యాట్రిక్ హిట్ కొట్టేందుకు రెడీ అవుతోంది ఈ కాంబో. హారిక హాసిని, గీతా ఆర్ట్స్ సంయుక్తంగా నిర్మించిన ఈ చిత్రానికి తమన్ అదిరిపోయే మ్యూజిక్ అందించారు. ఇప్పటికే ఆయన దరువు వేసి వదిలిన ‘సామజవరగమన’, రాములో రాములో సాంగ్స్ రిపీట్ మోడ్‌లో దంచికొడుతున్నాయి. ఈ రెండు సాంగ్స్ 100 మిలియన్ వ్యూస్‌ని దాటేసిన విషయం తెలిసిందే. మంచి మ్యూజికల్ హిట్ సాధించిన ‘అల వైకుంఠపురములో’ మూవీ జనవరి 12న ప్రేక్షకుల ముందుకు రానుంది.