‘ఖైదీ’ బ్లాక్ బస్టర్.. తెలుగులో భారీగా లాభం రాబట్టిన కార్తి సినిమా

రూ.100 కోట్లు ఖర్చుపెట్టి తీసిన సినిమా రూ.2 కోట్లు లాభం తెచ్చిపెడితే పెద్ద విషయం కాదు. కానీ, కోటి రూపాయల బడ్జెట్‌తో తీసిన సినిమా ఇంకో కోటి రూపాయల లాభం తీసుకొస్తే అది పెద్ద విషయం. ఇలాంటి సినిమాలు తెలుగులో ఎన్నో ఉన్నాయి. అయితే, తమిళం నుంచి తెలుగులోకి అనువాదమైన సినిమాలు కూడా ఈ స్థాయిలో లాభాలు తీసుకురావడం చాలా అరుదు. అలాంటి అరుదైన చిత్రం ‘ఖైదీ’. కార్తి హీరోగా నటించిన ఈ చిత్రం తెలుగు రాష్ట్రాల్లో మంచి వసూళ్లను రాబట్టింది. ఆంధ్రప్రదేశ్, తెలంగాణ రాష్ట్రాల్లో ప్రదర్శనను పూర్తిచేసుకున్న ఈ సినిమా రూ. 7.05 కోట్ల షేర్ వసూలుచేసింది. తెలుగు రాష్ట్రాల్లో ఈ చిత్ర థియేట్రికల్ హక్కులను రూ.3.5 కోట్లకు విక్రయించారు. దానికి రెండింతలు వసూలైంది. అంటే, 100 శాతం లాభం వచ్చింది. ఈ చిత్ర తెలుగు విడుదల హక్కులను ప్రముఖ నిర్మాత కె.కె. రాధామోహన్ సొంతం చేసుకున్నారు. వాస్తవానికి ఈ సినిమాకు ముందు ఆయన ‘కల్కి’, ‘బందోబస్త్’, ‘ఎన్జీకే’ సినిమాల విడుదల హక్కులను కొనుగోలు చేశారు. ఈ రెండు సినిమాలు ఆయనకు నష్టాల్నే మిగిల్చాయి. ఇప్పుడు ‘ఖైదీ’తో ఆయన లాభాలు అందుకున్నారు. వాస్తవానికి దళపతి విజయ్ ‘విజిల్’, కార్తి ‘ఖైదీ’ సినిమాలు ఒకేరోజు విడుదలయ్యాయి. ఈసారి విజయ్ సినిమాకు తెలుగులోనూ మంచి హైప్ రావడంతో ‘ఖైదీ’ని పెద్దగా ఎవ్వరూ పట్టించుకోలేదు. తొలిరోజు షేర్ కూడా కేవలం రూ.32 లక్షలు మాత్రమే వచ్చింది. కానీ, సినిమా బాగుందని టాక్ రావడం, రివ్యూలు కూడా పాజిటివ్‌గా రావడంతో కలెక్షన్స్ పుంజుకున్నాయి. కార్తి కెరీర్‌లో అత్యధిక గ్రాస్ వసూలు చేసిన సినిమాగా (తమిళం, తెలుగు కలుపుకుని) నిలిచిన ‘ఖైదీ’.. తెలుగులోనూ మంచి కలెక్షన్స్ రాబట్టింది.