‘దర్బార్’ ఫస్ట్ సాంగ్.. ‘దుమ్ము’లేపిన ఎస్పీబీ

సూపర్ స్టార్ రజినీకాంత్ పవర్‌ఫుల్ పోలీస్ ఆఫీసర్‌గా నటిస్తోన్న చిత్రం ‘దర్బార్’. నయనతార హీరోయిన్. ఎ.ఆర్.మురుగదాస్ దర్శకత్వం వహించారు. లైకా ప్రొడక్షన్స్ బ్యానర్‌పై ఎ.సుబస్కరన్ ఈ చిత్రాన్ని ప్రతిష్టాత్మకంగా నిర్మిస్తున్నారు. యువ సంగీత సంచలనం అనిరుధ్ రవిచందర్ సంగీతం సమకూరుస్తోన్న ఈ సినిమా నుంచి తొలిపాటను బుధవారం విడుదల చేశారు. ‘దుమ్ము ధూళి’ అంటూ సాగే ఈ పాట నిజంగా దుమ్మురేగిపోయేలా ఉంది. దిగ్గజ గాయకుడు ఎస్పీ బాలసుబ్రహ్మణ్యం ఈ పాటను ఆలపించారు. తమిళం, తెలుగులోనూ ఆయనే పాడారు. ఎస్పీబీతో పాటు అనిరుధ్ కూడా గొంతు కలిపారు. తెలుగులో అనంత్ శ్రీరామ్ సాహిత్యం అందించారు. ఎస్పీబీ ఎప్పటిలానే మంచి ఊపుతో పాడారు ఈ పాట. దుమ్ముదులిపారు. వాస్తవానికి రజినీకాంత్ సినిమాల్లో సోలో సాంగ్స్‌ను ఎస్పీ బాలసుబ్రహ్మణ్యమే పాడుతూ ఉంటారు. అయితే, ‘కబాలి’, ‘కాలా’ చిత్రాల్లో ఎస్పీబీ పాటలు లేవు. ఆ లోటును రజినీ ఇప్పుడు తీర్చేసుకున్నారు. ప్రస్తుతం ‘దర్బార్’ పోస్ట్ ప్రొడక్షన్ పనులు జరుగుతున్నాయి. ఇటీవలే రజినీకాంత్ తన పాత్రకు డబ్బింగ్ చెప్పడం పూర్తిచేశారు. సంక్రాంతి కానుకగా ఈ చిత్రాన్ని ప్రేక్షకుల ముందుకు తీసుకొచ్చేందుకు సిద్ధం చేస్తున్నారు. సూపర్ స్టార్ రజినీకాంత్‌తో ‘దర్బార్’ చేయడం థ్రిల్లింగ్ ఎక్స్‌పీరియన్స్ అని, ఆయనతో చేసిన డబ్బింగ్ సెషన్ తన లైఫ్‌లో మెమొరబుల్ అని ఇటీవల దర్శకుడు ఎ.ఆర్.మురుగదాస్ చెప్పారు. కాగా, ఈ చిత్రంలో నివేత థామస్ ఒక ముఖ్య పాత్రలో నటించింది. సునీల్ శెట్టి, తంబీ రామయ్య, యోగి బాబు, ప్రతీక్ బబ్బర్, నవాబ్ షా ఇతర ముఖ్య పాత్రలు పోషించారు.