టాలీవుడ్‌లో అవకాశం వస్తే కచ్చితంగా చేస్తా: ‘సంపంగి’ దీపక్

సరిగ్గా 18 ఏళ్ల క్రితం అంటే 2001లో వచ్చిన ‘సంపంగి’ సినిమా గుర్తుందా..? ఈ సినిమా ద్వారా ఢిల్లీ కుర్రాడు దీపక్ బజ్వా టాలీవుడ్‌కు హీరోగా పరిచయమయ్యారు. ఆ తర్వాత ‘కనులు మూసినా నీవాయే’, ‘ప్రేమలో పావని కళ్యాణ్’ సినిమాలతో తెలుగు ప్రేక్షకులకు దీపక్‌గా దగ్గరయ్యారు. ‘భద్ర’ సినిమా నుంచి క్యారెక్టర్ ఆర్టిస్టుగా మారిన దీపక్.. ‘అరుంధతి’, ‘కింగ్’, ‘మిత్రుడు’ వంటి భారీ చిత్రాల్లో చేశారు. తాజాగా ఈయన తమిళ చిత్రం ‘బిజిల్’లో ఓ ముఖ్య పాత్రలో నటించారు. దళపతి విజయ్ హీరోగా నటించిన ఈ చిత్రం తెలుగులో ‘విజిల్’ పేరిట విడుదలైన సంగతి తెలిసిందే. అయితే, సుధీర్ఘ విరామం తరవాత మళ్లీ తెలుగు ప్రేక్షకులకు తాను వెండితెరపై కనిపించడంపై దీపక్ ఆనందం వ్యక్తం చేశారు. తొలినాళ్లలో తనను ఆదరించిన తెలుగు ప్రేక్షకులకు ఇలాంటి మంచి సినిమాతో మళ్లీ కనిపించడం చాలా సంతోషంగా ఉందని అన్నారు. ప్రస్తుతం బాలీవుడ్‌లో సినిమాలు చేస్తోన్న దీపక్.. మళ్లీ తెలుగులో అవకాశం వస్తే తప్పకుండా చేస్తానంటున్నారు. ఈ మేరకు తెలుగులో తనకు అవకాశాలు ఇచ్చిన దర్శకులకు కృతజ్ఞతలు తెలియజేస్తూ ఒక ప్రకటనను విడుదల చేశారు. Also Read: ‘‘బాలీవుడ్‌లో ‘గురు’, ‘ప్యాషన్’ చిత్రాల తరువాత హీరోగా మూడు చిత్రాలు చేశాను. అవి విజయం సాధించలేదు. మళ్ళీ 2016లో ‘రుస్తుం’ చిత్రంలో అక్షయ్ కుమార్‌కు అపోజిట్‌గా నటించాను. ఆ చిత్రంలో ప్రతి నాయకుడిగా మంచి పేరు వచ్చింది. తమిళ్ సినీరంగంలో దర్శకుడు అట్లీ గురించి విన్నాను. తనే స్వయంగా ఫోన్ చేసి ఈ చిత్రంలో చేయమని అడిగారు. చాలా ఇంపార్టెంట్ పాత్ర అని చేశాను. విడుదలైన రోజునే థియేటర్‌లో సినిమా చూసాను. ఈ చిత్రం తెలుగు‌లో ‘విజిల్’గా విడుదలైందన్న విషయం నాకు మరింత సంతోషాన్ని కలిగించింది. ఎందుకంటే హీరోగా నాకు పుట్టుకనిచ్చింది తెలుగు సినీరంగం. ‘సంపంగి’ నుంచి ‘మిత్రుడు’ వరకు నేను చేసింది పది చిత్రాలే అయినా నన్ను ఎంతగానో ఆదరించారు తెలుగు ప్రేక్షకులు. వారికి మారోసారి ధన్యవాదాలు తెలుపుకుంటున్నాను. Also Read: ‘విజిల్’ సినిమాలో నేను ఫుట్‌బాల్ కోచ్‌గా నటించాను. ఈ చిత్రం చూసిన కొంతమంది టాలీవుడ్ దర్శకుల నుంచి నాకు ఫోన్ కాల్స్ వచ్చాయి. నీ మొదటి సినిమా ‘సంపంగి’ వచ్చి ఇప్పటికి 18 సంవత్సరాలు అవుతుంది.. నీలో భౌతికంగా ఎలాంటి మార్పు రాలేదు. మంచి ఫిట్‌నెస్ ఉంది. అప్పటి కంటే ఇప్పుడు లుక్ వైస్ చాలా బాగున్నావ్ అని అంటున్నారు. తెలుగులో మళ్లీ కంటిన్యూ చెయ్యొచ్చు కదా? అని అడిగారు. మంచి పాత్రలకు అవకాశం ఇస్తే తప్పని సరిగా చేస్తాను’’ అని దీపక్ పేర్కొన్నారు. తెలుగులో తనకు అవకాశమిచ్చిన సాన యాదిరెడ్డి, శ్రీను వైట్ల, నిర్మాత శ్యామ్ ప్రసాద్ రెడ్డి, బి.ఎ. రాజు, మంజుల నాయుడు, శివలంక కృష్ణ ప్రసాద్‌లకు ఈ సందర్భంగా దీపక్ కృతజ్ఞతలు తెలిపారు.