Chiranjeevi: ‘సైరా’ రూ. 500 కోట్లు ఆలిండియా షేర్ గ్యారంటీ.. రిలీజ్‌కి ముందే ‘కత్తి’ లాంటి కలెక్షన్స్

పెద్ద పెద్ద స్టార్లు నటించారు.. దండిగా డబ్బులు కూడా పెట్టారు.. ప్రమోషన్స్‌ కూడా కనీవినీ ఎరుగని రేంజ్‌లో చేస్తున్నారు. ఇక టీజర్, ట్రైలర్‌లు చూస్తే బొమ్మ హిట్టు అనేవారే తప్ప రెండో మాటలేదు. మెగాస్టార్ నటించిన ‘సైరా నరసింహారెడ్డి’ విడుదల కావడమే లేటు కాని.. బాక్సాఫీస్ వద్ద స్వైరవిహారం చేయడం ఖాయమే అంటూ లెక్కలు కట్టేస్తున్నారు మూవీ అనలిస్ట్‌లు. తొలి తెలుగు స్వాతంత్య్ర పోరాట యోధుడు ‘ఉయ్యాలవాడ నరసింహారెడ్డి’ జీవిత చరిత్ర ఆధారంగా తెరకెక్కిన మోస్ట్ వెయిటెడ్ ప్యాన్ ఇండియా మూవీ ‘సైరా’ భారీ అంచనాల నడుమ అక్టోబర్ 2 గాంధీ జయంతి సందర్భంగా ప్రేక్షకుల ముందుకు రానుంది. కొణెదల ప్రొడక్షన్స్‌లో మెగా పవర్ స్టార్ రామ్ చరణ్‌ ఈ చిత్రాన్ని సుమారు రూ. 300 కోట్ల రూపాయల భారీ బడ్జెట్‌తో నిర్మించగా.. చిరంజీవి సత్తాకి ఈ కోట్లు వెనక్కి తిరిగిరావడం పెద్ద కష్టం కాదంటున్నాడు మూవీ క్రిటిక్ మహేష్ కత్తి. పవన్ కళ్యాణ్ అంటే అంతెత్తున లేచిపడే మహేష్ కత్తి.. అన్న చిరు అంటే మాత్రం అభిమానమే. ఎంత అభిమానం అంటే.. సినిమా విడుదలకు ముందే ‘సైరా రూ. 500 కోట్ల ఆల్ ఇండియా షేర్ గ్యాంరంటీ’ అనేంత. మెగాస్టార్ చిరంజీవి సత్తా అంటే ఇదీ.. అంటూ రూ. 500 కోట్ల ఆల్ ఇండియా షేర్ రాబట్టడటం పక్కా అంటూ పోస్ట్ పెట్టాడు మహేష్ కత్తి. మొత్తానికి ఈ మూవీ క్రిటిక్‌ నుండి పాజిటివ్ పోస్ట్ రావడం అరుదు. సైరా విషయంలో అది జరగడం శుభపరిణామమే. ఇక సైరా విషయానికి వస్తే.. విడుదలకు రెండే రోజులు మిగిలిఉండటంతో ప్రమోషన్స్‌లో వేగవంతం చేశారు. సురేందర్ రెడ్డి దర్శకత్వం వహించిన ఈ భారీ చారిత్రాత్మక తెలుగుతో పాటు హిందీ, తమిళం, మలయాళం, కన్నడ భాషల్లో భారీ ఎత్తున విడుదల చేస్తున్నారు. అమితాబ్ బచ్చన్, నయనతార, తమన్నా, కిచ్చా సుదీప్, విజయ్ సేతుపతి, జగపతిబాబు, అనుష్క శెట్టి వంటి స్టార్లు నటించారు. అమితి త్రివేది ఈ చిత్రానికి సంగీతం సమకూర్చారు. రత్నవేలు సినిమాటోగ్రఫీ అందించారు.