కృతి సనన్‌కు అద్దె గర్భం కష్టాలు

టాలీవుడ్ అట్టర్ ఫ్లాప్ అయినా బాలీవుడ్‌లో మాత్రం మంచి స్టార్‌డంను సంపాదించుకున్నారు నటి కృతి సనన్. ‘బరైలీ కీ బర్ఫీ’, ‘లుకా చుప్పి’ వంటి మంచి కాన్సెప్ట్ ఉన్న సినిమాలతో మంచి పేరు తెచ్చుకున్నారు. ఇప్పుడు మరో ఇంట్రెస్టింగ్ సినిమాతో ప్రేక్షకుల ముందుకు రాబోతున్నారు. అదే.. ‘మిమి’. సరోగసీ (అద్దె గర్భం) అనే కాన్సెప్ట్‌తో ఈ సినిమా రాబోతోంది. ‘లుకా చుప్పి’ సినిమాకు దర్శకత్వం వహించిన లక్ష్మణ్ ఉతేకర్ ఈ సినిమాను తెరకెక్కిస్తున్నారు. తాజాగా ఈ సినిమా ఫస్ట్‌లుక్ విడుదలైంది. ‘అనుకోకుండా జరిగే మిరాకిల్స్‌తో నిండినదే జీవితం. ముందెప్పుడూ చూడని మరో ప్రయాణానికి సిద్ధం కండి. ఈ సినిమా ఎంతో ప్రత్యేకంగా ఉండబోతోంది’ అని పేర్కొంటూ పోస్టర్‌ను విడుదల చేశారు. ఇందలో కృతి ఓ చిన్నారికి తల్లి పాత్రలో నటిస్తున్నారు. చూడబోతే మరోసారి లక్ష్మణ్, కృతి కలిసి బ్లాక్ బస్టర్‌ను తమ ఖాతాలో వేసుకోబోతున్నారనే అనిపిస్తోంది. ఈ మధ్యకాలంలో బాలీవుడ్‌లో సరోగసీ కేసులు బాగా ఎక్కువైపోయాయి. సన్నీ లియోనీ, ఫరా ఖాన్, షారుక్, గౌరీ దంపతులు, కరణ్ జోహార్ తదితరులు సరోగసీ ద్వారా పిల్లలను పొందారు.