Bigg Boss 3 Telugu Elimination: ఓటింగ్ చీటింగ్.. బిగ్ బాస్‌పై హేమ సంచలన కామెంట్స్

బాధ ఉండదండీ.. హౌస్‌లో మా అక్క తోపు దమ్ముంటే ఆపు అంటూ అక్కను కంటెస్టెంట్స్ అందరూ అంతెత్తున లేపారు. తీరా అక్క అక్క అన్నవాళ్లే తనను తొక్కేశారంటున్నారు బిగ్ బాస్ సీజన్ 3 తొలి ఎలిమినేట్ కంటెస్టెంట్ హేమ. మిగతా కంటెస్టెంట్స్‌తో పోల్చుకుంటే కాస్తో కూస్తో పాపులారిటీ ఉన్న హేమ.. ఆదివారం నాడు బిగ్ బాస్ హౌస్‌ను తట్టా బుట్టా సర్దేసింది. బిగ్ బాస్ హౌస్ హౌస్‌కి వెళ్లిన తొలిరోజు నుండే మిగతా కంటెస్టెంట్స్‌పై పెత్తనం సాగిస్తూ.. నా మాటే శాసనం.. నేను వండిందే వంట.. పెట్టిందే తినాలి.. అన్నట్టుగా వ్యవహరించిన హేమను కంటెస్టెంట్స్‌తో పాటు ఆడియన్స్‌కూడా ఓట్ల ద్వారా సాగనంపేశారు. అయితే తొలివారంలోనే బయటకు వచ్చేయడంతో హేమ ఎమోషన్ అవుతున్నారు. నేను నాలాగే ఉన్నాను బిగ్ బాస్ హౌస్‌లో కూడా. అయితే కిచెన్ దగ్గర వచ్చిన చిన్న గొడవ మిగతాదంతా బాగానే ఉందంటూ సాఫ్ట్‌గా మాట్లాడిన హేమ.. బయటకు వచ్చాక బిగ్ బాస్‌పై ఫైర్ అవుతున్నారు. పక్కా ప్లాన్ ప్రకారం కుట్రపూరితంగా నన్ను బయటకు పంపారంటూ ఆవేదన వ్యక్తం చేస్తుంది హేమ. ఈ సందర్భంగా.. బిగ్ బాస్ ఓటింగ్‌పైన ఎలిమినేషన్ ప్రక్రియ పైన సంచలన కామెంట్స్ చేశారు. Also Read: గత రెండు సీజన్ల మాదిరే ఎలిమినేషన్ అయ్యి బయటకు వచ్చిన కంటెస్టెంట్స్ ఏదైతే ఆరోపణలు చేస్తారో అదే విధమైన కామెంట్స్ చేశారు హేమ. ‘హౌస్‌లో జరుగుతున్నది వేరు.. బయటకు చూపిస్తున్నది వేరు. ఆడియన్స్ ఎలా ప్రజెంట్స్ చేస్తే తనపై నెగిటివ్ థాట్ వస్తుందో.. అలా కట్ చేసి ఎపిసోడ్‌లను ప్రసారం చేశారని అది చూస్తే ఎవరికైనా తనదే తప్పు అనే భావన కలుగుతుందన్నారు. నిజానికి ఆ వంటగదిలో సింగర్ రాహుల్‌తో అసలు గొడవపడింది.. తాను కాదని.. వేరే వాళ్లు గొడవ పడితే తానే గొడవకు కారణం అన్నట్టుగా చూపించారన్నారు. ఇక ఎలిమినేషన్ విధానం సరిగా లేదని.. ఓట్లు కూడా ఎక్కువ తనకే అనుకూలంగా వచ్చాయంటున్నారు హేమ. అయితే హాట్ స్టార్ ద్వారా ఓటు వేసే విధానాన్ని కూడా తప్పుపట్టారు హేమ. చాలా మంది గూగుల్‌లో లాగిన్ అయ్యి.. గత సీజన్‌ల మాదిరి ఓటు వేయడానికి చూశారని.. అయితే హాట్ స్టార్ ద్వారా ఓటు వేయాలని మొదట చెప్పకపోవడంతో కన్ఫ్యూజ్ అయ్యారంటున్నారు హేమ. బిగ్ బాస్ నుండి తాను ఒకటి ఆశిస్తే.. అక్కడకు వెళ్లాక ఇంకోటి జరిగిందని.. తొలి నుండి తనపై నిర్లక్ష్యంగా వ్యవహరించార‌ని చివరికి బిగ్ బాస్ ప్రారంభ కార్యక్రమంలో అందరికి స్పెషల్ వీడియోలు వేశారని.. తనకు సంబంధించిన ఏవీ ప్రసారం చేయలేదంటూ బిగ్ బాస్‌పై తీవ్ర ఆరోపణలు చేశారు హేమ. అయితే ఎలిమినేట్ అయిన ప్రతి కంటెస్టెంట్ నుండి వచ్చే విమర్శలు ఇవే. సీజన్ 1లో జ్యోతి తొలి ఎలిమినేషన్ కాగా.. సీజన్ 2లో సంజనా అన్నే ఎలిమినేట్ అయ్యారు. ఇక మూడో సీజన్‌తో హేమ ఎలిమినేట్ కావడంతో.. బిగ్ బాస్ మూడు సీజన్లలలో ఎలిమినేట్ అయిన తొలి కంటెస్టెంట్స్ ముగ్గురూ మహిళలే కావడం విశేషం.