‘డియర్ కామ్రేడ్’కు 30 నిమిషాల కోత.. సూటిగా సుత్తిలేకుండా!

సినిమా బాగుంది.. కాకపోతే బాగా సాగదీశారు.. ఇది ‘డియర్ కామ్రేడ్’ సినిమా చూసిన చాలా మంది ప్రేక్షకుల స్పందన. సినిమాలో అనవసరపు సన్నివేశాలు ఉన్నాయని, అవి ప్రేక్షకుడిని విసిగిస్తాయని ఇప్పటికే విమర్శకులు రివ్యూలు రాశారు. ఈ స్పందనను పరిగణనలోకి తీసుకున్న దర్శక నిర్మాతలు.. చిత్ర నిడివిని 30 నిమిషాలపాటు తగ్గించారు. ఈ మేరకు చిత్ర నిర్మాత నవీన్ ఎర్నేని ఈ విషయాన్ని సోమవారం వెల్లడించారు. విజ‌య్ దేవ‌ర‌కొండ‌, ర‌ష్మిక మంద‌న జంట‌గా న‌టించిన చిత్రం ‘డియ‌ర్ కామ్రేడ్‌’. ‘ఫైట్ ఫ‌ర్ వాట్ యు ల‌వ్‌’ అనేది ట్యాగ్ లైన్‌. భ‌ర‌త్ క‌మ్మ ద‌ర్శకుడు. మైత్రీ మూవీ మేక‌ర్స్‌, బిగ్ బెన్ సినిమాస్ ప‌తాకాల‌పై తెరకెక్కిన ఈ చిత్రం ఈనెల 26న తెలుగు, త‌మిళ‌ం, మ‌ల‌యాళ‌, క‌న్నడ భాష‌ల్లో విడుదలైంది. మంచి ఓపెనింగ్స్ రాబట్టింది. ఈ నేపథ్యంలో చిత్ర నిర్మాతలు సోమవారం మీడియా సమావేశం నిర్వహించారు. ఈ సందర్భంగా నిర్మాత నవీన్ ఎర్నేని మాట్లాడుతూ.. ‘‘విడుదలైన మూడు రోజుల్లో మంచి వసూళ్లు వచ్చాయి. మూడు రోజులకు గాను రూ.21 కోట్లు వసూలు చేసింది. గ్రాస్‌లో చూసుకుంటే రూ.30 కోట్ల వరకు రాబట్టింది. హీరో విజయ్‌కు ఉన్న క్రేజ్ నేపథ్యంలో భారీ వసూళ్లు రావడం నిర్మాతలుగా మాకు ఆనందంగా ఉంది. అటు ఓవర్‌సీస్‌లో కూడా భారీ కలెక్షన్స్ వచ్చాయి. వీకెండ్ తరవాత ఈరోజు కూడా మంచి కలెక్షన్స్ రావడం పట్ల బయ్యర్లు హ్యాపీగా ఉన్నారు. అలాగే, ఈ సినిమా నిడివి ఎక్కువగా ఉందని, స్లోగా ఉందంటూ కామెంట్స్ రావడంతో 30 నిమిషాల సినిమాను కట్ చేసాం. మరోవైపు, క్యాంటీన్ సాంగ్ బాగా పాపులర్ అయ్యింది. నిడివి దృష్ట్యా దాన్ని పెట్టలేదు. చాలా మంది కావాలని కోరుకోవడంతో నేటి నుంచి ఆ సాంగ్‌ని జోడించాం. ఆ పాట సినిమాకు ఇంకాస్త ఊపు ఇస్తుందని భావిస్తున్నాం’ అని అన్నారు. మరో నిర్మాత య‌ష్ రంగినేని మాట్లాడుతూ.. ‘‘రెస్పాన్స్ చాలా బాగుంది. యూఎస్, యూకేల్లో మంచి క‌లెక్షన్స్ వస్తు్న్నాయి. ఫ్యామిలీ ఆడియెన్స్ సినిమాను బాగా ఎంజాయ్ చేస్తున్నారు. ఈ కథను ‘పెళ్ళిచూపులు’ తరువాత విజయ్ విని, నాకు వినిపించాడు. అప్పటికి ‘అర్జున్ రెడ్డి’ రాలేదు. ఆ తరువాత సినిమా మొదలుపెట్టాం. ‘అర్జున్ రెడ్డి’ పెద్ద హిట్ అవ్వడంతో ఈ స్క్రిప్ట్‌లో ఎలాంటి మార్పులు చేయలేదు. కానీ, సినిమా మాత్రం చేయాలని అనుకున్నాం. ఆ సమయంలోనే మైత్రి నిర్మాతలు నన్ను కలిశారు. వారివల్ల సినిమా స్థాయి పెరిగింది. అంచనాలకు తగ్గట్టుగా మంచి వసూళ్లు అందుకోవడం ఆనందంగా ఉంది’’ అని చెప్పారు.